Remburs atorlugu qularnaveeqqusiineq
Qulakkeereqatigiinneq suleqatigisap pilersueqataasup allap tungaatigut qularnaallisaatitut atorneqarsinnaavoq. Assersuutigalugu qulakkeereqatigiinneq nuusseqqusinermut uppernarsaatitaqartissinnaavat imaluunniit akiliinissamik peqqussutitalerlugu, taamaasillutit akiliineq pippat suliffeqarfimmut allamut ingerlateqqitassat annertussusaat aalajangiutereerlugu. Qulakkeereqatigiinneq nuunneqarsinnaasutut aaqqissuussaappat aamma ilaa tamaalluunniit pilersueqataasumut allamut ingerlateqqissinnaavat.
Qulakkeereqatigiinneq nuusseqqusinermut uppernarsaatitalik
Nuusseqqusinermik uppernarsaatitaqarpat nuusseqqusinermik tigumminnittup nalussanngilaa aningaasat tigusassani tigugunigit aatsaat tunisisoq akilerneqarumaartoq.
Akiliinissamik peqqussut
Akiliinissamik peqqussut atorlugu suleqatigisavit allap, soorlu immaqa pilersueqataasup, tunisisumit siulliulluni akilerneqarnissaa qulakkeersinnaavat. Akiliinissamik peqqussut inatsisitigut nuusseqqusinermut uppernarsaatitulli atuuffeqanngilaq, taamaammallu pisiortorfigisaq akiliisinnaajunnaassagaluarpat inatsisitigut aalajangiinikkut isumaqatigiissuteqarnikkulluunniit aatsaat akilerneqarnissaa isumannaarneqarsinnaalluni.
Qulakkeereqatigiinneq nuunneqarsinnaasoq
Qulakkeereqatigiinneq nuunneqarsinnaasutut aaqqissuussaappat ilaa tamaalluunniit pilersueqataasumut allamut ingerlateqqikkumallugu banki qinnuigisinnaavat. Bankip nuussisussap (ass. BankNordikip) aalajangissavaa qulakkeereqatigiinneq pilersueqataasumut nuunneqarsinnaassanersoq. Qulakkeereqatigiissummut isumaqatigiissutit allamut ingerlateqqinneqarneranni atugassarititaasut uku allanngorsinnaasarput:
- Qulakkeereqatigiinnerup aningaasartai akigititaasullu annikillisarneqarsinnaapput
- Atuuffianut, nassiunneranut kiisalu tunniussinissamut piffissarititaasoq sivikillisinneqarsinnaavoq