Sumi najugaqassavisi?

Arlassi inigisaa marluullusi inigisussanngorpisiuk - imaluunniit allamik, tamassi najugassassinnik inissarsiorpisi? Allamik inissarsiorniarussi eqqumaffigissavarsi aningaasaqarnikkut oqimaassinnaammat, nutsernerup nalaani piffissap ilaa init marluk attartorlugit aningaasartuutigisussaassagassigit - aningaasanik atuinissinnik missingersuusiornissinni taanna ilanngukkisiuk.

Initaarniarussi aalajangigassassi ilagissavaat pigisamik inissiaqarniarnerlusi, imaluunniit piginneqatigiilluni inissiaassanersoq, attartugaassanersorluunniit. Sorpassuit tassani apeqqutaassapput. Eqqarsaatiginiarisiuk qanoq sivisutigisumik tassani ineqarniarnerlusi - assersuutigalugu sivikitsuinnarmik tassani najugaqartussaagussi pisineq imminut akilinngitsoorsinnaavoq, illunik tuniniaasartumut taarsigassarsinermullu aningaasartuutit annertummata, sivisuumillu piginninnermi aatsaat sipaagassat malunnarsisarlutik. Taamaappat attartornissaq immaqa piukkunnarnerussaaq.

Arlassi inigeriigaanut aapparisaq nuuppat inissiaq pigisaanersoq attartugaanersorluunniit eqqumaffigissavarsi:

Aapparisavit inaanut pigisaanut nuukkuit aalajangersinnaavusi illit attartortutut tulluuttumik akiliisassasutit, taamaasillutit piginngisannut annertuallaarujussuartumik akiliisassanngilatit. Aamma inaanik piginneqataalersinnaavutit, taamaasillutillu aapparisallu illoqarnermut aningaasartuutinut assinganik akileeqataasarlutit - taamatuttaarlu aamma illuutigisaq akiitsui ilanngunnagit naleqalissappat taakkunannga piginneqataalerlutit. Piginneqataalerniaruit advokatimik illuutinik ilisimasalimmik oqaloqateqassaatit siunnersoqqullutit, aammalu katissimanngikkussi piginneqatigiinnermik isumaqatigiissusiortussaassallusi. Piginneqatigiinnermi isumaqatigiissusiorussi ilaatigut isumaqatigiissutigissavarsi qimassagaluarussi kina tassani ineqassanersoq, nalunaarnissamut piffissaliinerit, akiitsui ilanngunnagit nalingi qanoq avissanerisi il.il.

Aapparisavit attartugaanut nuukkuit, attartornermullu isumaqatigiissusiamut atit ilanngunneqarsinnaanngippat, taava ukiut marluk iluanni qimassagaluarussi illit inimut tassunga pisinnaaffeqartitaassanngilatit. Ukiut marluk sinnerlugit tassani najugaqarsimagussi tassaniiginnarsinnaatitaassaatit. Siunnersuutigisinnaavarput aappariikkunnaassagaluarussi kina tassani ineqassanersoq allaganngorlugu isumaqatigiissutigeriissagissi - ingerlanerliulertinnani tamakku isumaqatigiissutiginissaat ajornannginnerujuaannarpoq.

Pappialarsornermiinnersi iluatsillugu aamma arlarsi nuussagaluarpat depositum siumoortumillu akiliutigineqarsimasut qanoq avissanerisi isumaqatigiissutiginiarisigit.