BankNordikip aningaaserivimmiorpaluutit paasinanngitsut nungutinniarpai

Ukiut 100 sinnerlugit BankNordikimi sulisut inuit ataasiakkaat suliffeqarfiillu aningaasaqarneq pillugu siunnersortarsimavaat. Maluginiarsimavaat oqaatsit bankimi atorneqartartut paasiuminaatsinneqartartut. Maannali taamaakkunnaassaaq. BankNordikip bankimi oqaatsit paasiuminaatsut atorunnaarumallugit suliniuteqalerpoq, saniatigullu aamma ataatsimiititsisarnerit allanngortillugit – ataatsimiinnerit sumi qaqugulu pinissaat maanna sullitat aalajangertalissavaat. Suliniutit taakku marluk sullitat pitsaanerusumik sullinneqartarnissaat siu-nertaralugu ingerlanneqassapput.

BankNordik sullitaminut inunnut ataasiakkaanut suliffeqarfinnullu pitsaanerpaamik sullissiumalluni aallussisuuvoq. Sullissilluarneq paasiuminarsaanerlu siunertaralugit ilaatigut nittartakkamini toortagannguamik anginngitsumik pilersitsisimavoq. Toortagaq taanna toorlugu sullitat nittartakkami oqaatsit paasiuminaatsut nalunaarutigisinnaalerpaat. Paatsooqatigiinnerit toqqissisimannginnerillu annikillisarumallugit toortagaq pilersinneqarpoq, sullitat bankimi sullilluarneqartutut misiginissaat siunertaralugu.

”Isumaqarpugut sullitavut tamarmik aningaasaqarnertik pillugu pitsaanerpaamik aalajangertarnissaannut periarfissinnissaat akisussaaffigalugu. Illumik, biilinik angallammilluunniit pisineq imaannaanngeqaaq, taamaammat paaseqatigiilluarluta attaveqaqatigiinnissarput assorsuaq pingaaruteqarpoq. Tamanna atuuppoq sullitavut allakkatigut nalunaarfigigaangatsigit, aammalu nittartakkami allakkaangatta,” René Sørensen, BankNordikimi privatkundedirektøriusoq oqarpoq.

BankNordik Nuummi immikkoortortaqarfeqarpoq, sinerissamilu TELE-POST suleqatigalugu ingerlalluni, taamaasillunilu Kalaallit Nunaata annertunersaani attavigineqarsinnaalluni. Banki nunani avannarlerni misilittagaqarluartuuvoq, tamannalu ingammik sullitanut inuussutissarsiortunut siunnersuinernik pitsaasunik periarfissiisarpoq, suliffeqarfimmi takorluukkanik piviusunngortitsiniarnermi suleqatigineqarsinnaammat.

”Kalaallit Nunaanni inuussutissarsiortut suleqatigineranni pingaarnertut suliffeqarfiit ineriartornissamut periarfissaqarluarlutik atugaqarnissaannut suliniuteqaqataaneq aallutaraarput. Taamammat Kalaallit Nunaanni bankini siullersaalluta qanittukkut Europæiske Investeringsfond isumaqatigiissusioqatigaarput, taamaasillutalu suliffeqarfiit nutaaliorumasut piumasaqaatitigut sukanganngitsunik taarsigassissinnaalerlugit,” Tyt Mogensen, BankNordikimi erhvervskundedirektøriusoq oqarpoq.

Sullitat bankimi pitsaasumik sullinneqarnissaat BankNordikimi qitiulluinnarpoq. Taamaammat bankimi siunnersortit sullitatik pillugit tunniusimallutik sullissisarput, taamaammallu aamma sullitanik ataatsimeeqateqarneq maanna sullitat piumasaat aallaavigalugit aaqqissuunneqartalerput. Ilaatigut maanna sullitamut pitsaaneruppat siunnersortimik ataatsimeeqateqarneq sullitap angerlarsimaffiani pisinnaalerpoq. Bankimi ataatsimiinnerit nalinginnaasut, kiisalu telefonikkut internetikkullu ataatsimiinnerit aamma suli periarfissaassapput. BankNordikip neriuutigaa aaqqissuussinerup eqaannerulernera sullitanut nuannaarutaassasoq.

Uatsinni periarfissatit paasisaqarfiginerorusuppigit?

Uunga sianerfigitigut

34 79 00

... allaffigalutaluunniit