Angallatisinnginninni siunnersuutitsialaat

Arlallit oqartarput Kalaallit Nunaanniikkaanni angallammik angalaarnissamut periarfissaqartoqartariaqartoq. Qularutissaanngilaq namminerisamik angallateqarneq kiffaanngissuseqartitsisartoq. Nunatta kangerluppassuini sineriaanilu puigunaatsorpassuarnik misigisaqarnissamut periarfissaqarpoq. Pinngortitarsuaq naliitsoq unnuallu qaamasut. Arferit kangerlunni takussaasaraat. Meeqqat aalisakkamik pisaqaraangamik nuannaartut. Nammineq suluppaagartamik, saarullittamik nataarnartamilluunniit sassaalliuteqarsinnaanerup nuannersua. Paarnat nuniaqqammisat tuttullu neqaa sialluagaq. Tamakkuupput misigineqarsinnaasut ilaminiinnanngui.

Siunertaq pisariaqartitallu

Angallatisinissaq pilersaarusiorukku, qularnanngilaq angallatip qanoq ittuunissaanik kissaateqassasutit, soorlu nutaajussanersoq, atornikuussanersoq, aalisariutaassanersoq piniarnermulluunniit atorsinnaassanersoq. Aamma inuit qassit ilaasinnaanissaat eqqarsaatigereersimassagit qularnanngilaq, kisivit angalasarniarpit, ikinngutitit ilagalugit imaluunniit ilaqutariit meerartasilu tamassi angalasarniarpisi?

Angallat qanoq atortigisassaviuk? Inuit ilaannut angallammik attartorneq akikinnerusarpoq, assersuutigalugu akuttusuunik aatsaat angalanissamut periarfissaqartarniarussi. Isumassarsiatsialaavoq angallataatilinnik misilittagaat pillugit oqaloqateqarnissaq, taamatullu periarfissaqaraanni angallatinut assigiinngitsunut ilaalluni angalasaqataaqqaarnissaq isumassarsiatsialaavoq.

Isumannaallisaaneq

Angallammik ingerlatsisutut isumannaatsuunissaq illit akisussaaffigivat. Isumannaallisaanermut atortut eqqortut pigivigit, inatsisillu malillugit piumasaqaatinik maleruaappat? Atortut suut pisariaqarnerat, qanorlu ajutoornerit pinaveersaarnissaat kiisalu ajutooraanni qanoq iliortoqarsinnaaneranik paasissutissiissutinik pissarsiarisinnaasannik peqarpoq.

Aningaasalersuineq aningaasartuutillu

Angallatitaarniartillutit eqqarsaatersuutissat pingaarnerit ilagaat angallatit qanoq aningaasalersorneqassanersoq. Inuppassuarnut angallatitaarneq tassaasarpoq annertuumik aningaasaliineq, aningaasaqarninnut ukiuni arlalinni sunniuteqarsinnaasoq.

Angallatip pisiarinera kisimi akisunngilaq. Angallatip imminermini akiata saniatigut aammattaaq eqqarsaatigisariaqarpatit sillimmasiinernut, orsussamut, aserfallatsaaliinermut siumullu naatsorsuutigisimanngisanut aningaasartuutit. Aningaasartuutaasussat assigiinngitsut eqqarsaatigilluarukkit pilersaarusiorlutillu, taava angalanissamut akissaqalissaatit, misigisassarsiorsinnaallutit angallatillu annertunerpaamik nuannaarutissarsiffigalugu.

Angallatitaarnissannut ileqqaagaqarsimaguit, annertunerusumik siulequtsiinissaq toqqarsinnaavat. Tamanna iluaqutaasarpoq, siulequtsiinerit annertuneruppat pitsaanerusumik ernialersorneqarsinnaassagavit.

Angallatinik misissuilertinnak isumassarsiatsiaavoq aningaaserivimmi siunnersortivit oqaloqatigeqqaarnissaa, taassuma ilagalutit angallammut aningaasartuutissanut missingersuutit suliarisinnaavai. Angallat qanoq akeqarsinnaava? Qaammammut ilinnut atugassatut sillimmatigisavit ilai qanoq annertutigisut angallammut atorumavagit?

Allattuigit

Angallatitaarniarlutit aalajangeruit aningaasalersornissaalu isumannaarpat, illit pisariaqartitatit naapertorlugit angallammik ujarlersinnaalissaatit. Isumassarsiatsialaasinnaavoq eqqarsaatersuutigisavit allattornissai, angallat eqqortoq pisiarissagukku. Angallatissannit minnerpaaffissatut piumasaqaativit allassimaffiat assersuutitut ima isikkoqarsinnaavoq: