Ilinniartuutigut naapikkit
Sara Arilu naapikkit. Bankimi ilinniartuupput, 2022-milu septembarimi naammassisussaallutik.
BankNordikimi aningaasarsiornermut tunngasunik ilinniagaqarneq qanoq misigisaqarfigisimaneraat uani paasisaqarfigisinnaavat.
Sara Aviaja Egede
Ukiorpassuarni bankimi siunnersortinngornissara takorloortarsimavara, BankNordikimilu ilinniartunngorniarlunga aalajangerama isumaqarpunga pitsaanerpaamik aalajangiussillunga. Aallartikkamali tamarmik ilassilluartorujussuuaannga, naatsorsuutigisimasakkalu tamarmik piviusunngorput. Suligaangama ullup imarisarpaa ilinniarneq ineriartornerlu, Nuummi immikkoortortaqarfitsinni suleqatikka pikkorissut ilagalugit – aammalumi suleqatit Danmarkimiittut Savalimmiuniittullu peqatigalugit. Ilinniakkama ilagisarpaat systemit assigiinngitsut, suleqatigiinneq, sullitanut ataatsimiisitsinerit, suliassallu pissanganartut allat, aamma sorpassuarnut akisussaaffilerneqartarpunga. BankNordikimi ilinniartuuneq allanut innersuussutigilluinnarpara.
Ari Hermann
Augustimi 2020-mi ilinniartutut aallartippunga. Aallartikkamali akisussaaffinnik annertuunik tunineqartarpunga, assigiinngitsorpassuarnillu suliakkerneqartarlunga. Tamanna uannut pingaaruteqarpoq, ilinniarnikkut inuttullu pissarsiaqarnarlunilu ineriartornaqimmat. Aningaasarsiornermut tunngasunik ilinniagaqarnerup ilagaa atuarneq aningaaserivimmilu sulineq. Isumaqarpunga taakku akuleriissinneqarnerat iluartorujussuusoq, teoriit atuarfimmi ilikkagassat ulluinnarnilu timitalerlugit sungiunnissai taamatut anguneqartarmata. Suleqatimma ikiorluartarpaannga ilinniartillungalu – taamatullu ilinniartinneqaraangama aamma takusarpara siunnersortaalluarniaraanni suut pingaaruteqarnersut.
Ingerlatseqatigiiffimmi anginngitsumi annertuumik sunniuteqaqataagit
Suleqatigilerniartigut. Suliffitsinni aalajangiiniarnerit pisariitsumik pisarput, ineriartortuarnissaq tunaartaralugu ingerlasuuvugut, suleqatigiittullu ataqatigiilluartuulluta.