Qulakkeereqatigiinneq

Qulakkeereqatigiinneq - qallunaatut rembursimik taaneqartartoq - akileeriaasiuvoq nunani tamalaani akuerisaasoq isumannaatsupilussuarlu, nunat killingi qaangerlugit akiliinerni atorneqartartoq. Qulakkeereqatigiinnermi piumasaqaatitut isumaqatigiissutigineqarsimasut eqquutsinneqarsimappata pisisussap bankerisaata pisisup akiliinissaa qulakkeertarpaa. Pisisussap bankerisani saaffigissavaa tunisisumut pisussamik qulakkeereqatigiinnermik pilersitseqqullugu.

Qulakkeereqatigiinnerup atuuffii suuppat

Qulakkeereqatigiinneq qulakkeerinninnerullunilu akiliissutitut atuuffeqartarpoq. Qulakkeereqatigiinneq a-vista rembursiusinnaavoq, imatut aaqqissuussaalluni allagaatit piumasaqaatigineqartut pisisussap bankianut tunniunneqarpata akilerneqassalluni. Aamma kingusinnerusukkut akilerneqartussatut aaqqissuussaasinnaavoq, assersuutigalugu umiarsuakkut nassiunneqarneranit ullut 90-it qaangiuppata - tamanna tunisisup pisisullu isumaqatigiissutigisimassavaat.

Sooq qulakkeereqatigiinneq atorneqartarpa?

Tunisisoq pisisorlu imminnut ilisimarpianngikkaangata, tunisisorlu nioqqutinik nassiussitinnani pisisup akiliinissaa qulakkeerusukkaangagu qulakkeereqatigiinneq atorneqarajuttarpoq.