Suliffeqanngikkuit

Sivisuumik suliffeqarsimanngikkuit, imaluunniit suliffinniit soraaqqammeruit - misigissutsikkut nakkanganarsinnaanera eqqaassanngikkaanni - aamma aningaasaqarninnut sunniuteqangaatsiarsinnaavoq.

Piffissaq sivikinnerusoq eqqarsaatigalugu ulluinnarni aningaasaqarninni immaqa imatorsuaq allannguerujussuartariaqassanngilatit. Annertunerusumik allannguisariaqassaguit qujanartumik periarfissat arlaqarput:

Banki attavigiuk - peqatigiilluta aningaasaqarnerit misissuataartigu

Isertitatit annikillippata atuinerit qanoq oqimaaqatigiissarnissaanut siumullu aningaasaqarninnik pilersaarusiornissannut ikiorsinnaavatsigit. Ataatsimiigiartinnak aningaasartuutigisartakkatit misissuataarigit, atueriaatsinnilu sukkut allannguisinnaanerit eqqarsaatigilaarlugu.

Pilersaarusiorit - siunissaq qaninnerusoq ungasinnerusorlu eqqarsaatigalugit

Soorunami apeqqutaavoq suliffimmit ataatsimit allamut nuullutit suliffeqanngikkallaannarnersutit, sivisuumilluunniit suliffissaaleqinersutit. Ilimasupilunnissat soorunami kissaatiginngilarput, taamaattorli suliffissaarutissaguit siunissaq qaninnerusoq ungasinnerusorlu pillugit pilersaarusiornissat isumatusaarnerussaaq.

Siunissaq qaninnerusoq eqqarsaatigalugu aningaasartuutaasartut anginngitsut ilaat annikillisinneqarsinnaassapput, soorlu pisartakkanut, atuagassianut, neriniartarfinnullu cafénullu aningaasartuutit, immaqalu ileqqaakkat ilaat unitsikkallarneqarsinnaallutik.

Siunissaq ungasinnerusoq eqqarsaatigalugu imaassinnaavoq annertunerusumik allannguisariaqartutit, soorlu ineqarnermut, angallammut biilinulluunniit aningaasartuutaasartut misissoqqissaarlugit. Imaassinnaavoq aamma taarsigassarsiat akilersorunnaarallarneqarsinnaasut.