Angalaneq

Inuit ilaasa Kinami qarmarsuaq alakkarusuppaat, Egyptenimi pyramidersuit, Taj Mahal, imaluunniit nunarsuaq kaajallallugu - allat allamut pilaarlutik aallalaaginnarusuttarput. Takorluukkatit suugaluarpataluunniit aallartinnak piareersarluaruit iluaqutigissavat.

Silarsuaq takornariarfiginiarukku siunnersuutissavut pitsaanerpaat aajuku.

1. Sukumiisumik misissuigit

Sumut, qaqugu, qanoq sivisutigisumik? Qanormi akeqassava? Apeqqutit tamakku angalaniarlutit pilersaarusiorlutit aalajangertinnak eqqarsaatigisinnaavatit.

Aallalerluni aalajangigassat amerlaqaat - ingammik ungasissuliarniarnermi. Visum, unnuiffissanik inniminniineq, angalanermut sillimmasiineq, takusassat, kortit akiliissutit suut nassassappat... eqqarsaatigisassat ilaminiinnaraat.

Inuusuttunut angalatitsinermik immikkut ilisimasalinnik selskabeqarlunilu peqatigiiffeqarlunilu eqimattaqarpoq. Aallartinnak internetimi nassaareriarlugit siunnersuutaat isumassarsiorfissaataallu atorluarniarigit.

2. Katersineq

H.C. Andersen oqarnikuuvoq "Angalaneq tassa inuuneq". Kisianni aamma nalunngilarput angalaneq akisusartoq - assut. Taamaammat siusissukkut katersilereerniarna, ingammik ungasissuliarniaruit.

Ileqqaakkanut naatsorsuuterput atorlugu takorluukkavit piviusunngortinnissaannut qanoq annertutigisumik qanorlu sivisutigisumik ileqqaagaqarnissat ajornanngitsumik naatsorsorsinnaavat.

3. Marlunnik kortilerlutit aallarit

Aallaleraanni assigiinngitsunik marlunnik korteqarneq iluaqaaq - ass. Visa/Dankortilu Mastercardilu. Isumannannginnerussaatit taava, korti ataaseq tammassagaluarpat, imaluunniit sumi arlaanni pisiniarlutit assersuutigalugu Mastercard kisimi atorsinnaappat.

Siusissukkut kortip atorunnaarfissaa misissoruk, angalanerit tamaat kortip atorsinnaanissaa isumannaarlugu.

Nunap tikeraakkavit aningaasaataannik tigummiaqalaartarit, assersuutigalugu taxanut, imeruersaatinut assigisaannullu atorsinnaassavatit. Kisianni angalatillutit aningaasanik amerlasuunik tigummiaqartarniaqinak.

4. Uppernarsaatit eqqaamallugit

Sumukaraluaruilluunniit aallaraangavit najugaqarnermut uppernarsaatit nassartuaannaruk. Nassanngikkukku napparsimavimmi suliarineqarnissaq nakorsaatillu tamaasa nammineq akilertussanngussavatit. Europami nunani amerlanerpaani tassunga ilanngullugu aamma Europami peqqinnissaqarfimmut sillimmasiinermut uppernarsaat aamma takutinneqartussaasarpoq.

Illoqarfigisanni innuttaasunut sullissivimmi nunaqarfigisanniluunniit nunaqarfiup allaffianut najugaqarnermut uppernarsaat Europamilu peqqinnissaqarfimmut sillimmasiinermut uppernarsaat aasinnaavatit.

5. Aallartinnak angalanermut sillimmasernissaq eqqaamajuk

Aallartinnak angalanermut sillimmasernissat pingaaruteqarpoq, nunani allani napparsimavinnut nakorsaatinullu akiliutitit Kalaallit Nunaanni peqqinnissaqarfimmit akilerneqarnavianngimmata, aamma angerlamut ingerlanneqassagaluaruit tamanna nunatta peqqinnissaqarfiata akilernavianngilaa.

Sillimmasiineq ukununnga atuuttarpoq

  • Tassanngaannartumik napparsimalerneq
  • Suliaritinneq
  • Napparsimavimmi uninnganeq
  • Angerlamut ingerlanneqarneq

6. Kapuutit, kapuutit, kapuutit ...

Tikeraagassannukartinnak kapitinnissaq suut pisariaqartissanerlugit misissortariaqassavat. Siusissukkut tamanna isumagisariaqarpat, ilaatigut kapitinnerit tulleriit arlallit pisussaasarmata.

7. Visum

Europap avataani nunani amerlasuuni visumeqarnissaq piumasaqaataasarpoq, tassa nunap iserfiginissaanut akuersissut. Nalinginnaasumik nunap aallartitaqarfianit visum pissarsiarineqartarpoq, pappialaasinnaavoq aammali passimi naqissutaasinnaalluni.

Visumimik qinnuteqarnermi piffissaq suliarineqarfia akialu assigiinngitsupilussuusarpoq. Taamaammat siusinaarluarlutit nunamut tikeraarniakkannut visumeqartariaqassanerlutit paasiniaagina, akuerisaassaguillu piumasaqaatit misissorluarlugit.

8. Oqitsumik poortuigit

Oqartarput "less is more". Ingammik sivisuumik angalassagaanni nassatallu nammassagaanni pingaaruteqarpoq. Internetimi angalanilikkersaartarfiit blogit arlaqarput poortuinissamullu siunnersuuteqartarput, misissuilaarlutit poortuinissannut isumassarsiorsinnaavutit atorluarsinnaasannik.

9. Ajortoqassappat

Angalanerpit nalaani ajortoqarataassagaluarpat piareersimanissaq iluaqutaassaqaaq. Nunami tikeraagassanni alarmcentral, ajutoortoqartillugu sianerfissaq, misissoreeriuk.

Pinartumik pisoqassappat sillimmasiisarfik angalanermut sillimmasiinermik pisiffigisimasat attavigisinnaavat. Sillimmasiisarfiit amerlanerit ulloq unnuarlu pinartoqartillugu sianerfissamik telefonnormoqartarput - sianerfissaq normu taanna nassartuaannaruk.

Ileqqaagaqarneq

Ilinniarnerup saniatigut suliffeqarneq

Ilinniartut

Sullitanut periarfissatsialak

NordikSolo

18-init 28-nut ukiulinnut

Uatsinni periarfissatit paasisaqarfiginerorusuppigit?

Uunga sianerfigitigut

34 79 00

... allaffigalutaluunniit