Banki pillugu

BankNordik Kalaallit Nunaanni angusaqarluarpoq

BankNordikip 2018-imi naatsorsuutimi inernerat ullumi saqqummersippaa. Niuerfinni tamani ingerlalluarnermik takutitsipput. Ingerlatseqatigiiffiup naatsorsuutaasa inernerat akileraarutit sioqqullugit katillugit 323 mio. kr.-uvoq, Kalaallillu Nunaanni immikkoortortaqarfiup niuernera ingerlalluarneranut akuulluinnarpoq. Ukiumi qaangiussimasumi BankNordik Kalaallit Nunaanni 5%-imik annertuseriarsimavoq, bankimilu siulersuisut suli annertuseriaqqissinnaaneranik periarfissanik ilimasuuteqarluarput.

”Ukioq 2018 ingerlatseqatigiiffimmut ingerlalluarfiusimavoq, inernerilu assut naammagisimaarutigaagut. Ukioq taarsigassarsisitsinikkut annikitsumik siuariarfiuvoq, niuerfitsinnilu tamani ingerlalluarnermik takussutissiinerit erserput, Kalaallit Nunaanni aamma. Kalaallit Nunaanni ingerlatsinitta inerneraa 22 mio. kr., maluginiagas-sallu allat ilagaat ukiumi 2019-imi tamaani sullitagut amerleriarsimammata, aammalu amerlasuut pingaarnertut bankerilersimammatigut. Ineriartornissamut pilersaaruterput Kalaallit Nunaanni inerneqarluarpoq, tamannalu nuannaarutigaarput,” Árni Ellefsen, BankNordikimi pisortaaneq oqarpoq.

Naak ernianit isertitaqarniarneq suli ajornakusoortuarsinnaraluartoq, sullitanut nutaanut orniginarsimavugut taarsigassarsisitsinerpullu ineriartortissinnaasimallugu. Tamatuma saniatigut naatsorsuutit inerneqarluarneranni peqqutaaqataapput aningaasartuutinik aqutsineq periutsinillu nutarsaajuarneq, aammalu appartitsinerit utertinneqarsimasut, ingerlatseqatigiiffiullu Savalimmiuni pisortaqarfiata tu-nineqarsimanera.

Sullitanik attaviginninnerup nukittorsarneqarnissaa kiisalu sullinneqarnerup pitsanngorsarneqarnissaa BankNordikip sivisujaamik aallutarisimavaa. Niuernikkut alloriarnerit assigiinngitsut saniatigut inuiaqatigiinni iluaqutissanik naleqalersitsisussanik pilersitsinissaq aallussimavarput. Taamaammat BankNordik-legatip saniatigut legatimik allamik pilersitsisimavugut. BankNordik-legati ukiut tamaasa ilinniartunut sisamanut tapiissutigineqartarpoq, tamatumalu saniatigut maanna ilinniartoq kalaaleq ataaseq Nordatlantisk Gymnasieklassemi ilinniartoq legat-issaqartilerparput. Legati 150.000 kr.-inik naleqarpoq, ukiullu pingasut ingerla-neranni tunniunneqartassalluni.

”Inuiaqatigiinnut arlaatigut tunniusserusuppugut, aalajangersimavugullu inuusuttut ilinniagaqarnerisa qaffassarneqarnissaannut tapersersueqataajumalluta. Nalunngilarput ilinniagaqarsimagaanni nuannersumik pissanganartumillu suliffeqarnissaq tunngavilerneqarsinnaasoq, tamannalu aamma inuiaqatigiit ineriartortuarnissaannut pingaaruteqartoq. Neriuppugut legatit tunniunneritigut inuusuttut ilinniagaqarnissaannut kajumissaareqataasinnaassalluta, taakkununnga iluaqutaassammat, aammattaarli inuiaqatigiinnut nukittorsaataassammat,” Árni Ellefsen oqarpoq.

2018-imi ukiumut naatsorsuutit inerneri pingaarnersiukkat

  • Akileraarutit sioqqullugit inernerat tassaavoq 323 mio. kr. 2017-imi 235 mio. kr.-uvoq.

  • Appartitsinerit sioqqullugit ingerlatsinerup inernera 179 mio. kr.-uvoq, 2017-imi 187 mio. kr.-ulluni. 

  • Taarsigassarsiarititanik appartitsinernik utertitsineq 111 mio. kr.-uvoq, 2017-imilu appartitsinernik utertitsineq 60 mio. kr.-ulluni.

  • Ingerlatsinerup inernera 289 mio. kr., 2017-imilu 246 mio. kr.-ulluni.

  • Bankip taarsigassarsisitsinera 2017-imi 9,5 mia. kr.-usoq, 2018-imi 10 mia. kr.-inut qaffariarsimavoq.

  • Bankip uninngatitai 2017-imi 12,6 mia. kr.-usut qaffariarsimapput 2018-imilu 13,4 mia. kr.-ulersimallutik.

  • Akiliisinnaassusaa qaffariarsimavoq, 2017-imi 19,7%-iusoq 2018-imi 19,8%-iuvoq.

  • Bankip siulersuisuisa naatsorsuutigaat 2019-imi appartitsinerit sioqqullugit ingerlatsinerup inernera 160-200 mio. kr.-ip nalaaniissasoq (2018-imi: 179 mio. kr.), ilanngaatissallu ilanngaatigereerlugit inernera 100-150 mio. kr.-ip nalaaniissasoq (2018-imi: 262 mio. kr.)

Paasissutissat sukumiinerusut
Árni Ellefsen, pisortaaneq, tlf: +298 230 348