Banki pillugu

BankNordik suliffeqarfinnut nutaaliortunut aningaasaleeriaatsimik nutaamik periarfissiivoq

Kalaallit Nunaanni Savalimmiunilu aningaaserivinni siullersaalluni BankNordik Europami Aningaasaliinermut Fondi, EIF, isumaqatigiissusioqatigisimavaa, taamaasillunilu suliffeqarfinnut nutaaliortunut taarsigassiisinnaalerluni piumasaqaatitigut sukanganngitsunik.

BankNordikip EIF-illu isumaqatigiissusiaat aallaavigalugu BankNordik sullitaminut inuussutissarsiortunut nutaanik taarsigassiisinnaalerlutik. Taarsigassarsiassat taakku piumasaqaatitaat unammillersinnaalluartuupput, kiisalu EU-p aaqqissuussaanit “InnovFin”-imit qularnaveeqqusigaallutik. InnovFin-ip siunertaraa Europami suliffeqarfiit minnerusut anngajaallu aningaasalersorneqarsinnaanerisa pitsanngorsarneqarnissaat. Aatsaat siullerpaamik Kalaallit Nunaanni Savalimmiunilu taamatut periarfissiisoqalerpoq, taamaasillutillu suliffeqarfiit aaqqissuussaalluartut nutaaliortullu BankNordik aqqutigalugu nutaaliorlutik suliniutigerusutaminnut aningaasalersorneqarsinnaalerput.

EIF-ip suleqatigilerneratigut BankNordikip sullitani inuussutissarsiortut katillugit 300 mio. kr.-inik nalilinnik taarsigassissinnaalerpaat, taarsigassiissutigineqartullu nalingata 50 %-iat InnovFin-ip qularnaveeqqusertassavaat. InnovFin-imit piumasaqaatigineqartut tamarmik malinneqarnissaat qulakkeerumallugu taarsigassarsiumalluni qinnuteqaatit tamaasa BankNordikip suliarisassavai.

“EIF-ip suleqatigilernera nuannaarutigaarput, naatsorsuutigaarpullu Kalaallit Nunaanni Savalimmiunilu sullitatsinnut inuussutissarsiortunut iluaqutaassasoq. Isumaqatigiissusiarput peqqutaalluni isumatusaartumik taarsigasseeriaaseqarnerput attatiinnaraluarlugu maanna suliffeqarfiit nutaaliortut suliniuteqarnissaannut iluarnerusumik taarsigassiisinnaalerpugut,” Árni Ellefsen BankNordikimi pisortaaneq oqarpoq.

InnovFin suliniutinut nutaaliortunut tapersiisarpoq, tassaasinnaapput nutaaliorluni aallarnisaanermi aningaasalersorneqarneq, imaluunniit suliniutit aalajangersimasut nutaaliornermik ataavartumilluunniit periuseqarluni nioqqutissiornermik aaqqissuussinermilluunniit ilaqartut, tassaasinnaappullu nioqqutit kiffartuussinerilluunniit. Suliniutit suliffeqarfiup ataavartumik siuariartornissaanut tapeeqataasinnaasutut nalilerneqartut BankNordikip aningaasalersortarumaarpai. InnovFin-imik qularnaveeqqusigaasumik taarsigassarsiniarluni qinnuteqaatit suliarineranni akiitsorsinnaanermik naliliineq nalinginnaasoq ilaajuaannarpoq.

InnovFin pillugu uani paasisaqarnerusinnaavutit

Suliffeqarfiutivit sullinneqarnissaanut periarfissat paaserusuppigit?

Uunga sianerfigitigut

34 79 00

... allaffigalutaluunniit