Soraarnerussutisiassanik katersinermut tunngatillugu isumaqatigiissusiorneq

SISA aamma BankNordik Nunatsinni soraarnerussutisiassanik katersinermut tunngatillugu suleqatigiinnissamut aningaaseriviuk sullitaanut atatillugu isumaqatigiissuteqarput. Isumaqatigiissut isumaqarpoq BankNordik-imit sullitat – taakkua suliffeqarfinni Nunatsinniittuni suliffeqartut, suliffeqarfitillu aqqutigalugit soraarnerussutisiassanik katersanut akiliuteqartartut, periarfissaqarput – Kalaallit Nunatsinni pissutsit malillugit – pisariaqartitanik tamakkiinerungaartumik naammassinnittumik aamma soraarnerussutisiassanik aaqqissuussinermik akimigut pitsaasuusumik sullinneqarsinnaalernissamik. Soraarnerussutisiassanik aaqqissuussinermi ilaapput BankNordik-imi katersaqarnermik aamma
sillimmasersornermik matussusiisunik aammalu SISA-mi inuuneq naallagu soraanerussutisiaqarnissamik ilaqartumik.

SISA Nunatsinni soraarnerussutisiassanik aaqqissuussivittut inuuneq naallugu soraarnerussutisianik tigooqqaaviusinnaasutut ukiunilu 10-ini qulakkeerinnissimasutut kisiartaavoq, tunngaveqarporlu paasissutissanik Nunatsinni naatsorsueqqissaartarfimmersunik. 66-inik ukiulik Nunatsinni naatsorsueqqissaartarfiup paasissutissaatai malillugit agguaqatigiisillugu inuuneqqortussuseqarpoq ukiunik 80,6-inik, sanilliussigutta Qallunaat inuuneqqortussusaat naatsorsorneqarsimavoq ukiunik 88,0 –inik.

Pissusiviusut taamaasillutik imaapput qaammatikkaartumik inuuneq naallugu tigusartagassat ilaasortamut ataatsimut SISA-mit tunniunneqartartut 33 %-imik qaffasinnerupput Qallunaat inuuneq naallugu pisartagaannut qallunaallu inuuneqqortussusaannut sanilliutissagaanni.

SISA-mi tuniniaanermut pisortaq oqarpoq: ”BankNordik-ilu sivisulaartumik eqqartorsimavarput qanoq ililluta ataatsimoorluta BankNordik-ip sullitai pitsaanerpaamik soraarnerussutisiaqalersinnaanerannut neqoroorfigisinnaanerlutigit. Ataatsimoorluta kissaaterput tassaasimavoq tamatta ingerlatsivigisatsinniit soraarnerussutisiassanik aaqqissuussineq immikkuualuttutigut pitsaanerpaanik periarfissiissasoq. Isumaqarpugut tamanna iluatsilluartumik angusimagipput. Aaqqissuusisimavugut tamatsinnut pitsaasumik, minnerunngitsumik BankNordik-ip sullitaanut iluaqutissartalimmik. Pitsaasumik isumaqarluartumillu suleqatigiinnissarput qilanaaraarput.”

BankNordik ukiut 100-it sinnerlugit ingerlasimavoq tamatumalu malitsigisaanik sullitaminik aningaasaqarnermut tunngasunik aammalu soraarnerussutisissanut tunngasunik siunnersuinermut misilittagaqarluarluni. Aningaasariviup pingaartippaa inuit ataasiakkanut pisariaqartitaannut tulluartumik aaqqissuussissalluni.

”BankNordk-ip naafferaartumik sorarnerussutisiassanik tigooqqaanisamik neqorooruteqarneratigut aamma SISA-p inuuneq naallugu soraarnerussutisiassanik tigooqqaanissamik tapertariittumik neqorooruteqarnerisigut sullitanut pitsaanerpaamik soraarnerussutisiassat pillugit aaqqiissuteqarneq angusinnaasimavarput, taamatut aaqqiinermi Nunatsinni pissutsit tunngavigalugit aaqqissuusssivugut. Taamatuma saniatigut pitsaasunik aamma unammillerluarsinnaasunik sillimmasersuinernut SISA aqqutigalugu soraarnerussutisiassanut aaqqissuussinermut ilanngullugit neqorooruteqarsinnaavugut. Tamanna inuunermut toqqissisimanernersumik sullitatsinnut pilersitsissaaq,” taamatut oqarpoq BankNordik-imi inuinnarnik sullissinermi pisortaq René Sørensen.

SISA aamma BankNordik ukioq manna siusinnerusukkut sullinneqarnissamik isumaqatigiissusiorput – aaqqiineq tulluarsarluagaq – BankNordik-ip SISA-mut tunngatillugu ineriartortitaanik. Aaqqissuussineq tunngaveqarpoq soraarnerussutisiassanut aningaasaateqarfiup aalajangersimasumik aaqqiissuteqarnissamut kissaateqarneratigut aamma sullinneqarnissamik pisariaqartinneqartut ilaasortat soraarnerussutisiassaminnut toqqorterinermimmut akiliutaasa isumagineqarnissaanut tunngasumik.

”Ilaasortat soraarnerussutisiassaminnut BankNordik aqqutigalugu toqqorterinerannut akilersuinermut aaqqissuussineq nutaaq sulisitsisunit sukkanarnerujussuarmik isumaginnissinnaalernerannik kinguneqartussaavoq, aamma oqinnerulertussaavoq aningaasartuutikinnarnerulertussaallunilu”, taama oqarpoq Michael Linfos, ingerlaqqipporlu: ”Uagutsinnut pingaaruteqarpoq unammillerluarsinnaasumik aningaasartuuteqarnikkut inissisimassasugut ilaasortatsinnut tamanut iluaqutaasumik”.

SISA-mut tunngatillugu paasissutissat
SISA ilasortanit pigineqarpoq taamaattumillu aktiaatilinnut sinneqartoorutinik tunniiussisussaanani. Anguniagaq tassaavoq soraarnerussutisiassanik aaqqissuussinernik kattuffinnut Nunatsinnilu inuussutissarsiortunut soqutiginartunik pilerinassusilinnillu neqorooruteqarsinnaanissaq, pitsaanerpaamik erniaqartunik aamma appasinnerpaamik aarlerinaateqarsinnaasunik.

• 30. juni 2019 soraarnerussutisiassatut katersat katillugit annertussuseqarput 3.514 mio. kr.-nik.
• 2018-imi toqqortikkatut akiliutigineqarput 257,1 mio. kr.-nit.
• Ilaasortamut ataatsimut 2018-imi aningaasartuut annertussuseqarpoq 451 kr.-inik.
• SISA-mut suliffeqarfiit Nunatsinneersut 200-init amerlanerit sulisorisamit soraarnerussutisiassaannut akilioraapput.
• 2018-imi inuit soraarninngorsimasut 940-it katillugit 38,9 mio. kr.-inik tunniussiffigineqarput.

BankNordik-imut tunngatillugu paasissutissat
BankNordik Nunatsinni, Danmarkimi aamma Savalimmiuni aningaaserivittut ingerlataqarput, aammalu Savalimmiuni sillimmasersuinermik aallutaqarlutik. BankNordik TELE-POST suleqatigalugu Nuummi immikkoortortaqarfitsik aallaavigalugu Nunatta annersaani inunnit ataasiakkaanit aamma suliffeqarfinnit attavigineqarsinnaavoq. Suliffeqarfissuaq Savalimmiuni ukiut 100-it sinnerlugit matuma siorna tunngavilerneqarpoq, ataatsimullu katillugit 16,7 mia. kr.-inik nalilinnik pigisaqarluni 400-ngajalluinnarnillu sulisoqarluni. Aningaaserivik aningaaserivittut allatuulli Finanstilsynip ataani nakkutigineqarluni ingerlavoq aamma Nasdaq Copenhagen-imi aningaasanik nalilinnik niuerfimmi ilaavoq.