BankNordikimi siulersuisut inissipput

BankNordikip ileqquusumik ataatsimeersuarnera martsip 26.-ni inger-lanneqarpoq. Ataatsimeersuarnerup kingorna siulersuisut inissititerput, Ben Arabo siulittaasuliullugu, tassanilu aamma aalajangiunneqarpoq 2019-imit iluanaarutit piginneqataasunut agguaanneqassanngitsut

BankNordikip ileqquusumik ataatsimeersuarnera pilersaarutit malillugit ingerlanneqarpoq, naak coronavirus pissutaalluni ataatsimeersuarneq pisarnermit
allaanerungaatsiartumik aaqqissuunneqaluartoq. Covid-19-ip siaruaatinnginnissaa anguniarlugu oqartussaasut innersuussutaat malikkumallugit ataatsimeersuarnermi peqataasut sapinngisamik ikitsunnguutinniarsarineqarput. Assersuutigalugu siulersuisut takkutinngillat, piginneqataasullu arlallit namminneq takkunnatik piginnaatitsissummik tunniussisimapput.

Ben Arabo siulersuisuni siulittaasunngorpoq

Ukiuni kingullerni tallimani BankNordikip siulersuisuini siulittaasuusimasoq Stine Bosse nalunaarsimavoq qinigassanngorteqqinniarnani, taamaammat ataatsimeer-suarneq sioqqullugu ilisimaneqareerpoq siulersuisut nutaamik siulittaasoqalertussanngortut. Ataatsimeersuarnerup kinguninngua bankip siulersuisui inissititerlutik ataatsimeeqatigiipput, tassanilu Ben Arabo siulittaasussatut qinerpaat John Henrik Holmilu siulittaasut tulliattut qinerlugu.

”BankNordikip siulersuisuini siulittaasussatut qinigaasimanera nuannaarutigaara. Ingerlatseqatigiiffiup inissisimalluarnerata suli siumut nukittorsarnissaanut inerisarnissaanullu, unammillersinnaassutsikkullu pitsanngorsartuarnissaanut suleqataanissara qilanaaraara. Piffissami matumani bankitut nukittuutut inissisimaannarnissaq unammillersinnaajuarnissarlu pingaaruteqarluinnarpoq, niuernikkut pissutsit makku atuutsillugit BankNordik sullitaminik ikiuilluarnissaa qitiulluinnarmat,” Ben Arabo BankNordikip siulersuisuisa siulittaasortaavat oqarpoq.

BankNordikip siulersuisui maanna ukuupput:

Ben Arabo, siulittaasoq
John Henrik Holm, siulittaasup tullia
Barbara P. Vang, siulersuisuni ilaasortaq ataatsimeersuarnermi qinigaasimasoq
Jógvan Jespersen, siulersuisuni ilaasortaq ataatsimeersuarnermi qinigaasimasoq
Gunnar Nielsen, siulersuisuni ilaasortaq ataatsimeersuarnermi qinigaasimasoq
Hans Arni Bjarnason Thomsen, siulersuisuni ilaasortaq ataatsimeersuarnermi qinigaasimasoq
Kenneth M. Samuelsen, sulisut sinniisaat
Dan Rasmussen, sulisut sinniisaat
Alexandur Johansen, ingerlatseqatigiiffiup sinniisaa

2019-imit iluanaarutit agguaanneqassanngillat

COVID-19 inuiaqatigiinnut BankNordikillu niuerneranut qanorpiaq kinguneqartitsissanersoq suli oqaatigiuminaappoq, taamaammallu ingerlatseqatigiiffiup
aningaasaqarnikkut qanoq ingerlanissaa assut nalilersoruminaalluni. Taamaammat banki isumaqarpoq iluanaarutit 67,2 mio. kr.-iusut piginneqataasunut agguaanniarlugit pilersaarutini taamaatittariaqarlugit. Taamaammallu 2019-imit iluanaarutit agguaanneqannginnissaat ataatsimeersuarnermi isumaqatigiissutigineqarpoq.

Ataatsimeersuarnermi aalajangiunneqartut makkuupput:

  • Siulersuisut BankNordikip 2019-imi ingerlatsinerat pillugu nalunaarutaat tusaatissatut tiguneqarpoq
  • BankNordikip 2019-imi ukiumoortumik nalunaarutaa akuerineqarpoq
  • 2019-imi iluanaarutit agguaatinnginneqarnissaannik siulersuisut siun-nersuutaat akuerineqarpoq
  • Ataatsimeersuarnermi siulersuisuni ilaasortassanik arfinilinnik qinersinissamut siulersuisut siunnersuutaat akuerineqarpoq
  • Bankip siulersuisuisa ilaasortassaat ataatsimeersuarnermi qinigaasut ukuupput: qinigaaqqittut Barbara Pállsdóttir Vang, Jógvan Jespersen, John Henrik Holm aamma Gunnar Nielsen, qinigaasullu nutaat Ben Arabo aamma Hans Arni Bjarnason Thomsen.
  • P/F Januar aamma PricewaterhouseCoopers bankip avataaniit kukkunersiuisussamisut qineqqippai
  • Siulersuisut 2020-mi siulersuisunut akissarsiassatut siunnersuutaat akuerineqarpoq