Aktianik niuerfinni pissutsit

Ilimasuutigineqartut akerliannik aasaq manna aktianik niuerfinni pissutsit eqqissiallassimapput.

Nunarsuarmi aktiat ataatsimut isigalugit coronap pissutaanik nalikilleriarnerit februaarimi martsimilu pisut martsimit juunimut nalittoriartornikkut nalimmassarneqaqqissimapput. Taamaasillutik nunarsuaq tamakkerlugu aktiat ukiortaap nalaanut naleqqiullugit 5%-iinnarmik appasinnerupput.

Juunimili aktiat mianersortumik pisimapput, naatsorsuutigaarpullu nunarsuarmi pissutsit nalorninaateqangaatsiarnerat tassunga pissutaasimassasut, coronap tuniluunnera tamatumalu nunarsuarmi aningaasaqarnermut qanoq kinguneqartitsinissaa suli nalunartoqangaatsiarmat.

Takusinnaavarput nunarsuaq tamakkerlugu aningaasaqarneq assorsuaq ajornartorsiortoq, coronalu maanna sukkasuumik tuniluutileqqissimalluni. Akerlianilli nunani amerlasuuni nappaassuarmik ajornartorsiornerup aningaasaqarnermut sunniutai naatsorsuutigisamit oqinnerusumik qaangerneqarsimapput. Tamatumunnga minnerunngitsumik peqqutaavoq pisortanit ikiorsiissutit suliffeqarfinnut atuisunullu iluaqutaasimaqisut.

COVID-19 aningaasaqarnermut qanoq kinguneqartitsissava?

Piffissaq ungasinnerusoq eqqarsaatigalugu COVID-19-ip aningaasaqarnermut qanoq kinguneqartitsinissaa ilisimanngilarput. Inuppassuit angerlarsimaannarpata privatimik atuineq annikillissaaq, taamaasillunilu suliffeqarfiit isertitaat annikillissallutik.

Akerlianilli nunani assigiinngitsuni ammaassineq sukkasuumik ajornarpallaanngitsumillu pissappat imaassinnaavoq aningaasalersuisartut pingaarnerit kingullertigut pissutsit niuerfinni sunniutitut annikitsutut nalileraat. Kisianni ammaassiniarneq sivisussappat tuniluuteqqinnerillu pillattaallutik, taava suliffeqarfippassuit naatsorsuutigisimasaminnit annikinnerusumik isertitaqarnissaat ilimagisinnaavarput, tamannalu aktiat nalinginut apparsaataassaaq.

Aningaasaleeriaatsit attatiinnaruk

Pingaarnertut innersuussutigaarput aningaasaleeriaatsip attatiinnarnissaa, nalorninaatinullu piffissalersuinermullu tunngatillugu aaqqissuussinerit allanngortinnginnissaat. Taamaaliornissamut periarfissatsialaavoq fondimi aktianik obligationinillu atuisumik aningaasaliinissaq.

Fondi akuleriissitaq aqqutigalugu ileqqaakkatit aningaasaliissutigigukkit, assersuutigalugu BankInvest Optima aqqutigalugu, taava nalorninaatinut tunngatillugu aaqqissuunneqarnerat ataavartinneqassaaq, aktiat obligationillu fondimi agguataarneqarnerat sapinngisamik assigiiaartinneqartarmat. Tassa imaappoq aktiat nalingi apparaangata aktianik pisiortortarlutik, nalingilu qaffakkaangata ilai tunineqartarlutik.

• Optima pillugu uani paasisaqarnerusinnaavutit.

Bankip aningaasaliissuppatit

Bankimit aningaasaliissunneqarnermik isumaqatigiissuteqaruit oqaatigisinnaavarput ineriartorneq malinnaaffigeqqissaarlugu naliliivigiuarlugu, iluanaarutinut nalorninaatinullu tunngatillugu tulluarnerpaasorisatsinnik nalimmassaajuarluta.

Martsimi aktiat akikinnerpaaffissaminnut pilivissullu aktianik pisiortorpugut, tamatumalu kingorna pisinerit taakku iluanaaruteqarfigillattaasimallugit. Massakkorpiaq aningaasaliissutit aktiatai pisarnermit annikinnerulaarput, akerlianilli obligationini erniaqarluartuni aningaasaliinerit pisarnermit annertunerulaarlutik.

Suleqatitsinnit marlunnit innersuussinerit

Atuagassiami Pengenytimi saqqummeqqammersumi Andrea Panzieri, BankInvestimi aningaasaliinermut pisortaq, kiisalu Janne Bjerregaard, Sparinvestimi chefporteføljemanageriusoq apersorneqarput. BankInvest aamma Sparinvest aningaasaliinermut atatillugu qanimut suleqatigisaraagut.

Taakku sivisuumik aningaasaliinermik suliaqarsimapput, apersorneqarnerminnilu ilaatigut suliaminnut atatillugu misilittakkaminnik piukkunnartunik assersuusiorlutik oqaluttuartinneqarput, tamarmillu erseqqissarpaat aningaasaliinermi piffissaq ungasinnerusoq eqqarsaatigalugu pisarnissaq aningaasaleeriaatsimillu attassinissaq pingaaruteqartut. Apersorneqarnerat uani atuarneqarsinnaavoq. (qallunaatut allassimavoq)

Pensionimut tunngasut

Nutaarsiassani malinnaagaanni taamaassorinarsinnaagaluartoq pensionimut ileqqaakkat aningaasaliissutigisimagaanni nalikillinerit maanna pisut taamarsuaq sunniuteqarnissaat ilimananngilaq. Pensionimut ileqqaakkat ingerlaavartumik aningaasaliissutigisaraanni aningaasat annikitsukkuutaarlugit qaammatit tamaasa aningaasaliisoqartarpoq. Taamaaliornermi aningaasaliinerit ilaannikkut nalittortarput ilaannilu nalikillisarlutik – assersuutigalugu qaammat kingulleq nalikillinikkut annaasaqarsimagaanni, taava qaammat una aningaasaliinerit akikinnerussapput. Tamanna peqqutigalugu ileqqaagaqalernermit soraarninngornissap tungaanut niuerfinni iluanaarutit agguaqatigiissillugu nalingat iluanaarutigineqarajuttarpoq. Ukiumit ukiumut nalikillinikkut nalittornikkulluunniit nikeriarujussuarnerit annertunerusumik tassunga kinguneqartitsineq ajorput.

Sullitat soraarninngornissaminnut qanillisimasut aningaasaliissutaanni nalorninaatit annikinnerutinneqarajuttarput, tassa aktiatai annikinnerullutik, inuusunnerumaanullu aktiatai annertunerusarlutik.

Nalorniguit apeqqutissaqaruilluunniit attavigitigut

Oqaloqatigerusukkutsigut attaviginiaritigut – assersuutigalugu aningaasaleeriaatsit illit kissaatinnut pisariaqartitannullu tulluarnersoq qulakkeerusukkukku.

• Sulisuvut ugguuna nassaarisinnaavatit.

• Aamma internetikkut ataatsimeeqatigisinnaavatsigut – tamanna ugguuna paasisaqarfiginerusinnaavat.