BankNordik Kalaallit Nunaanni angusaqarluar-poq ineriartornikkullu ingerlalluarluni

BankNordikip ullumi ukiumut 2019-imut naatsorsuutit inernerat saqqummersippaa, akileraarutillu sioqqullugit 260 mio. kr.-uvoq. Kalaallit Nunaanni niuernikkut ingerlatsinerat angusarissaarnerannut ilaavoq, bankimilu aqutsisut nunatsinni suli annerusumik ineriartortitsinissamut periarfissaqarnerarpaat.

Naak erniat aningaasartuutaanerat isertitaqarniarnermi suli maannamut akornutaasaraluartoq BankNordikip 2019-imi ingerlatsinera tamakkiisumik isigalugu ajunngitsumik ingerlavoq. Sullitat eqeersimaarput, bankilu sullitaminut periarfissanik nutaanik iluaqutissaasunik pilersitsiortorsimavoq. ”2019-imi ingerlatsinitta inernera assut iluarivarput, niuerfinni akuuffigisatsinni tamani ingerlalluarnermik takutitsipput. Kalaallit Nunaanni taarsigassarsisitsinitta annertussusaa 33%-imik qaffariarsimavoq, tassuunalu takusinnaavarput sullitat aningaaserinikkut eqeersimaarsimasut,” Árni Ellefsen BankNordikimi pisortaaneq oqarpoq.

Suliffeqarfinnut nutaaliortunut aningaasalersuineq

2019-imi BankNordikip Den Europæiske Investeringsfond suleqatigilerpaa, tamannalu aqqutigalugu suliffeqarfinnut nutaaliortunut iluatinnartunik taarsigassarsisitsisinnaalerluni. Ulloq manna tikillugu BankNordik Kalaallit Nunaanni kisiartaalluni taamatut taarsigassarsisitsisinnaavoq, taamaammallu suliffeqarfiit piujuartitsisunik nutaaliornertalinnillu suliniuteqarumallutik aningaasalersorneqarumallutik saaffiginnittartut arlaqarsimapput.

Inuiaqatigiinni tapersersuineq

Sullitanut periarfissanik nutaanik digitaliusunillu pilersitsinerup saniatigut BankNordikip inuiaqatigiit iluanni nukittorsaanissaq 2019-imi suliniuteqarfigisimavaa. Taamaammat BankNordik-legatip ukiumut katillugit 100.000 kr.-inik naleqartup – ilinniartunut kalaallinut sisamanut tunniunneqartartup – saniatigut legatimik nutaamik 150.000 kr.-inik nalilimmik pilersitsisimavoq, legatilu nutaaq Nordatlantisk Gymnasieklassemi ilinniartumut kalaallimut ataatsimut tunniunneqartarpoq. Legati ukiut pingasut ingerlaneranni tunniunneqartarpoq, ilinniarneq ukiunik pingasunik sivisussuseqarmat.

”Nalunngilarput inuiaqatigiit ineriartortuassappata ilinniagaqarnissaq pisariaqartoq, tamannalu aamma suliffeqarnikkut ingerlalluarniaraanni tunngavissaasoq. Inuusuttut ilinniagaqarnissaannut tapersersorumallugit legatinnatsitsisarpugut, taamaasillutalu inuiaqatigiinni qaffasinnerusumik ilinniagaqarsimasut amerliartornissaat suliniuteqarfigalugu,” Árni Ellefsen oqarpoq.

2019-imi naatsorsuutit inerneri pingaarnersiukkat

  • Akileraarutit sioqqullugit inernerat tassaavoq 260 mio. kr., 2018-imi piffimmi tassani 323 mio. kr.-uvoq.

  • Appartitsinerit sioqqullugit ingerlatsinerup inernera 185 mio. kr.-uvoq, 2018-imi piffimmi tassani 179 mio. kr.-uvoq.

  • Taarsigassarsiarititanik appartitsinernik utertitsineq 105 mio. kr.-uvoq, 2018-imilu piffimmi tassani 111 mio. kr.-ulluni.

  • Ingerlatsinerup inernera 289 mio. kr.-uvoq, 2018-imilu piffimmi tassani 289 mio. kr.-ulluni.

  • Bankip taarsigassarsisitsinera 2018-imi 10 mia. kr.-iusoq, 2019-imi 9,9 mia. kr.-nut appariarpoq.

  • Bankip uninngatitaqartitsinera 2018-imi 13,4 mia. kr.-usimasoq qaffariarsimavoq, 2019-imilu 14,4 mia. kr.-ulersimalluni.

  • Akiliisinnaassusaa 2018-imi 19,8%-iusoq 2019-imi 22,3%-inut qaffariarsimavoq.

  • Aqutsisut naatsorsuutigaat ilanngaatissat ilanngatigereerlugit ingerlatsinerup inernera 100-150 mio. kr.-ip   nalaanissasoq (2019-imi: 207 mio. kr.).