BankNordik sullitaminut digitaliusumik periarfissaqartitsilluarnerpaasutut nersornaasigaavoq
Ullumi nalunaarutigineqarpoq BankNordik ataatsimeersuarnermi ”Ukiormanna Digitaliusumik Aningaaserivitsialak”-mi sullitanut digitaliusumik periarfissaqartitsilluarnerpaasutut nersornaasigaasimasoq. Aammattaaq nersornaasiinerit katinneranni BankNordik nr. 2-nngortuuvoq.
”Ukiormanna Digitaliusumik Aningaaserivitsialak” ukiut tallimassaanik ingerlanneqaqqammerpoq, tassanilu aningaaseriveqarnerup silarsuaani digitaliusumik ineriartortitsineq immikkut sammineqarpoq. Ataatsimeersuarnermi aningaaseriviit pikkorinnerpaasut nersorneqartarput, taamaasillutillu digitaliusumik sullissinermi pitsanngorsaaniarsimanertik pillugu nersorniarneqartarlutik. Naak ukiormanna COVID-19 pissutaalluni ataatsimeersuarneq taamaatiinnarneqaraluartoq ajugaasut nersorneqarput. BankNordik nersornaammik “Sullitanut periarfissat digitaliusut pitsaanerpaat”-mik nersornaaserneqarpoq, aammalu aningaaseriviit akunnattumik angissusillit akornanni nersornaasiinerit katinneranni nr. 2-nngorluni.
”Sullitanut digitaliusunik periarfissaqartitsilluarnerpaasutut nersornaaserneqarnerput assorsuaq nuannaarutigalugulu tulluusimaarutigaarput. Digitaliusumik siuarsaaneq BankNordikimi aallutarisimavarput sullitat sullinneqarnerminnik iluarisimaarinninnerat siuarsarumallugu, sullissinerpullu sukkanerulersikkumallugu pitsanngorsarumallugulu, taamaammat tamannarpiaq pillugu nersornaaserneqarnerput assorsuaq kajumissaataavoq. Sullitat iluarisimaarinninnerannik siuarsaaniarnermi periarfissat digitaliusut qitiulluinnarput. Digitaliusumik sullissinitsinni anguniagaraarput sullitatta ulluinnarni isumagisassatik oqitsumik ajornaatsumik akornuteqanngitsumillu naammassisinnaassagaat,” Turið F. Arge BankNordikimi forretningsdirektøriusoq oqarpoq.
Sullitanut periarfissat digitaliusut pitsaanerpaat
BankNordik Netbankimik nutaamik pilersitsinerminut atatillugu ajunngitsumik naliliivigineqarsimavoq, Netbanki ukioq 2021-p ingerlanerani sullitanit atorneqarsinnaalerumaarpoq. Tassani periarfissat amerlanerussapput, tassuunalu sullitat oqinnerusumik banki attaveqarfigisinnaalissavaat aningaaserivitsigullu isumagisassatik naammassisinnaassallugit. Netbankimik suliarinninnerup saniatigut aamma nittartagaq, digitaliusumik attaveqarneq inoqatinullu attaveqaatini suliat pillugit BankNordik nersorniarneqarpoq.
Ukiormanna Digitaliusumik Aningaaserivitsialak
Sullissineq eqaatsumik sukkasuumillu ingerlatikkumallugu BankNordik aamma periarfissanik digitaliusunik allanik pilersitsisimavoq. Assersuutigalugu banki robotimik pilersitsisimavoq periarfissanik 100-nik suliaqarsinnaasunik aningaaseriviup iluani suliat oqilisarneqarnissaannut ikiuutaasumik. Roboti nammineerluni nioqqutissanik isumaqatigiissutissanillu pilersitsisarpoq, 2020-milu ukiup affaani siullermi 3 millioneriarluni atorneqareersimalluni. 2019-imi robotip atorneqarneri 2 millionit sinnerpai. Nersornaasiinermi aaqqissuisut tunngavilersuinerminni ilaatigut BankNordikip robotinik atortorissaaruteqarnera erseqqissarpaat.
BankNordikip sullitat iluarisimaarinninnerannik siuarsaaniarneq ingerlatiinnarniarpaa, imminut kiffartuulluni periarfissanik pitsanngorsaanikkut kiisalu attaveqariaatsimik inuttaminut tulluarsagaasumik, toqqaannartumik piukkunnartumillu pilersitsinikkut.