Erngup innarliisinnaanera pinngitsoortikkumallugu siunnersuutit tallimat

Illut imermit innarlerneqarsimasut tusaamasimassajunnarsivatit, immaqa ikinngutitit suleqatitilluunniit tamakkuninnga ilungersuuteqarlutillu aningaasartuuteqarujussuarnikuupput. Illuuteqaruit erngup innarliinissaanik pinaveersaartitsinissat innersuussutigaarput. Erngup innarliineranut peqqutaagajunnerusarput ruujorit nuisaannanngitsut ruujorersuarnullu attavilerfiit ernalersimaneri sequmissimaneriluunniit.

Erngup innarliinera akisoorujussuusarpoq

Erngup innarliinera amerlanertigut akisoorsuusarpoq – akissaajaataallunilu allatigut annaasaqarfiusinnaavoq. Ilaqutariittut illorsi imermit innarlerneqarpat ilungersunartupilussuusinnaavoq.

Soorunami imermit innarliisoqannginnissaa tamakkiisumik qulakkeerneqarsinnaanngilaq. Kisianni siunnersuutit uku tallimat atorlugit erngup innarliinissaraluanut ilimanaat annikillisissinnaavat– immaqalu allaat innarliisoqarnissaralua paasiaarsinnaallugu, taamaasillutillu piffissaagallartillugu iluarsisinnaallugu.

1. Imermut uuttuut eqqumaffigiuk

Illup imermut uuttuutaa iluaqugilluarsinnaavat. Illumi imermik atuisoqanngikkaangat imermut uuttuut maluginiarsinnaavat. Uuttuut uninnganngippat imaassinnaavoq ruujorit arlaannit kuuttoqartoq, anartarfilluunniit koorusaartoq.

Qaammatit tamaasa uuttuutip kisitsisitaa malinnaavigalugu allattorsimaffimmut allattarukku arlaannik ajortoqariataassagaluarpat aamma malunnarnerussaaq.

2. Ruujorit nuisaannartut maluginiakkit

Erngup aqqutai illup iluaniittut nuisaannartut eqqumaffigineqarluarsinnaapput, assersuutigalugu kissarsuutip eqqaani ruujorit, igaffimmilu asaffiup ataani skaavimmiittut. Isigiinnarlugu imermik aniasoqarnersoq takujuminaassinnaavoq, kisianni køkkenrullemit pappialamineq ruujorit katiffiinut tutsikkukku takusinnaassavat.

Igaffimmi asaffiup ataani ruujorit immikkut maluginiagassaapput. Asaatit baaliat allallu ruujorinut taakkununnga kallunneqarajuttarmata ruujorit equsinnaasarput allatulluunniit innarlerneqarlutik, taamaammallu ammaneqalersinnaallutik. Maluginiartanngikkukkit asaatit puussiallu tunuanni ruujorit koorusaarsinnaapput, taamaasillutillu skaavik, nateq, iigarluunniit innarlerneqarsinnaalluni.

Erngup aqqutaasa eqqaanni manngertornittoqarsimanera ruujorilluunniit kusertut takussagukkit imeq qipisartukkut milissavat ingerlaannarlu ruujorilersoq attavigalugu.

3. Nammineq iluarsartuussisartunut angutinut arnanullu oqariartuut

Ruujorilerinermut atatillugu nammineq iluarsiiniarneq mianersuutassaavoq. Suliassatit ilisimalluanngikkukkit imeqarnermut ruujorinullu tunngasut ilinniarsimasunut isumagitittassavatit. Taamaaliortaruit aamma ruujorit eqqortumik aserfallatsaalineqarsimanissaat qulakkiissavat, ajortoqassagaluarpallu sillimmasiisarfimmit utertitsivigineqarnissat qulakkeerlugu. Errorsivik erruivillu aamma ilinniarsimasunut isumagitittassavatit. Akeqaraluarlutik imminut akilerluarsinnaavoq. Sillimmasiisarfimmi suleqatigisatsinni Købstædernes Forsikringimi oqaatigaat innarliinerit pisartut amerlasoorpassuit eqqunngitsumik ikkussuinermik slangemilluunniit kiggissimasumik peqquteqartartut.

Aamma iikkakkut natikkulluunniit qilleriniaruit ruujorit ledningillu sumiiffii eqqumaffigisassaapput. Qillerininni ruujorimik eqqugaqartoornissat pinngitsoortinniarlugu multidetektorimik pisisinnaavutit, taanna atorlugu ruujorit kabelillu iikkaniittut naterniittullu sumiissusersisinnaavatit.

4. Isugutsertoqarnersoq eqqumaffigiuk

Isugutak imermit innarliisoqarneranut takussutissaasinnaavoq. Nateq nipituumik neeqquluttaleriataarpat, iikkalluunniit isugutserpata, ruujorimik napisoqarsimaneranut takussutissaasinnaavoq. Illu isugutsersimasorigukku isugutammut uuttuummik pissarsiorsinnavutit, taanna atorlugu ilumut ini isugutsersimanersoq paasisinnaavat.

5. Errorsivik erruivillu immikkut eqqumaffigisassaapput

Errorsivik erruivilluunniit kuserfissamik allequtsersinnaavat, taava imermik kuuttoqartarnersoq ingerlaannaq paasissavat.

Sillimmasersimagaannimi ilaa taarsiivigitittarput?

Aap, qujanartumik erngup innarliinera illumut pequtinulluunniit sillimmasiinermi ilaasarpoq. Kisianni innersuussutigaarput erngup innarliinera pissagaluarpat sillimmasiinerit qanoq atuutissanersoq misissoqqullugu.

Illumut sillimmasersimaguit ruujorit nuisanngitsut ernalerlutilluunniit sequmissagaluarpata taarsiivigineqarnissat ilimagisinnaavat. Kisianni ruujorit nuisaannartut kuulissagaluarpata taarsiivigineqarniaruit tamatumunnga immikkut sillimmasersimanissaq piumasaqaataagajuttarpoq.