Internetimi niuernermi kortimik akiliinermi isumannaallisaaneq pitsanngorsarumallugu malittarisassat nutaat

Sapaat januaarip 10. 2021 aallarnerfigalugu EU-mi Dankort, Visa/Dankort imaluunniit Mastercard atorlugu internetimi akiliinermut atatillugu malittarisassat nutaat atuutilissapput.

Malittarisassat nutaat malillugit siunissami akiliileraangavit akiliineq uku arlaat atorlugit uppernarsarneqartassaaq

• NemID nøgleapp-i imaluunniit
• Isissutissaq illit kisivit atukkat, kingornalu kode toortagassaq ataasiaannarluni atortagaq SMS-ikkut allagarsiarisat

Allannguutit siunertaraat internetimi niuernermi kortimik akiliinerup isumannaallisarnissaa.

NemID pappialaq atorneqarsinnaanngilaq – NemID nøgleapp-i atussavat

Akiliinitit NemID atorlugu uppernarsartarniarukkit NemID-mit nøgleapp-i atortassavat, nøglekorti (korti pappialaq) tassunga uppernarsaanermi atorneqarsinnaanngimmat. App Store imaluunniit Google Play aqqutigalugu nøgleapp-i aasinnaavat.

Nammineq isissutissaqarnikkut SMS-isinikkullu uppernarsaaneq

Akiliileraangavit isissutissaq illit kisivit atukkat SMS-ikkullu toortagassamik nassitsinneq atorlugu uppernarsaasarniaruit Nets-ip nittartagaanut iserlutit isissutissat pilersissinnaavat. Isissutissaq taanna pilersilerukku NemID atortariaqassavat (tassani nøglekorti/korti pappialaq atorsinnaavat).

Apeqqutissaqaruit, malittarisassalluunniit nutaat malilerumallugit ikiugassaaguit attavigisinnaavatsigut.

Kortimik akiliineq pillugu paasissutissat pingaarutillit

• Mobilepay aamma Apple Pay suli atuinnarsinnaavatit, isumannaallisaanikkut piumasaqaatit malillugit aaqqissuussaareeramik
• Pisiniarfinni nalinginnaasuni kortip chip-itaa atoriarlugu pinkode toortarlugu akiliinerit allanngussanngillat.
• Korti attuutsinnagu akiliinerit suli pisinnaapput. Arlaleriarlutit attuutsitsinak akiliisimaguit taamaasillutillu akiliinermi killiliussaq qaangerlugu akiliisimallutit, taava pinkode toortaqquneqassaaq. Tassani allanngortoqarnavianngilaq.
• Nuussinerit ilaanni isumannaallisaanikkut piumasaqaatit pisariaqassanngillat. Soorlu assersuutigalugu nunani allani aqqusinerni, ikaartarfinni, biilillu uninngasarfiini akiliisitsivinni. Internetimi pisinermi akiliinerit annikitsut pigaangata aamma immikkut isumannaallisaanikkut akuerineqarnissaq pisariaqartassanngilaq.
• Pisiniarfinni – nalinginnaasuni internetimiluunniit – sullitat kinaassusaanik uppernarsaanissamut malittarisassanik pisariaqavissunik atuilersimanngitsuni pisigaluaruit akiliinerit itigartinneqassaaq
• Kortimi titarneq kajungerisartuusoq atorlugu akiliineq atorneqarsinnaajunnaassaaq, isumannaallisaanermut piumasaqaataasut atuuttut malillugit titarnerup kajungerisartup isumannaassusaa naammannginnami.