Erniat qaffaqqilerput

Sapaatip-akunnera kingulleq Europami centralbankip nationalbankillu erniat qaffaqqippaat, tassungalu atatillugu BankNordikip uninngatitanut taarsigassarsianullu erniat qaffaqqilerpai.

Uninngatitanut kontot nalinginnaasut, soorlu akissarsianut ingerlatsinermulluunniit konto, allanngornatik taamaaginnassapput, akerlianilli ileqqaakkanut soraarnermusianullu kontot erniaat 0,30%-point p.a. tikillugu qaffanneqassapput, taarsigassarsianullu erniat sullitanut privatinut inuussutissarsiortunullu 0,30%-point p.a. tikillugu qaffaavigineqassallutik.

Erniat allanngornerat sullitanut inuussutissarsiortunut januaarip 31-ani atuutilissaaq, sullitanullu privatinut februaarip 28-ani atuutilissalluni. Taamaattorli ineqarnermut tunngasunut taarsigassarsianut erniat martsip 31-ani qaffanneqassapput.

Kontot erniakkaat nutaat

Januaarip qiteqqunneranit kontot erniakkaat nutaat marluk periarfissaatigilissavagut. Kontot assigiinngitsut marluussapput, sullitanillu inuussutissarsiortunit privatinillu atorneqarsinnaassallutik, ukiuni marlunni pingasuniluunniit aningaasat pituttorlugit uninngatikkaanni qaffasissumik erniaqartitsisuussallutik.

Sullitat privatit minnerpaamik 50.000 kr.-inik uninngatitsissapput, sullitallu inuussutissarsiortut minnerpaamik 100.000 kr.-inik, annerpaaffissamik killeqanngilaq. Aningaasat uninngasussaanerisa nalaani aningaasanik tigusisoqassagaangat aningaasat tiguneqartut nalingat aallaavigalugu dekortimik akiliisoqartassaaq.

• Konto erniakkaaq ukiunut marlunut: Ukiumoortumik erniat aalajangersimasut 1,75% ulloq 01.02.2025 tikillugu

• Konto erniakkaaq ukiunut pingasunut: Ukiumoortumik erniat aalajangersimasut 2,25% ulloq 01.02.2026 tikillugu  

Januaarip 16-ianit februaarip 28-ata tungaanut 2023 kontonik erniakkaanik pilersitsisoqarsinnaassaaq. Taamaattorli aningaasanik ikisinissamut piffissaliussaq bankip qaquguluunniit sivikillisissinnaavaa.