BankNordikip sullitanut privatinut akit allanngortitilerpai
Sullitanut privatinut akiliutit akillu assigiinngitsut naliliivigineqarnerinut atatillugu BankNordik aalajangersimavoq akiliutit arlallit atorunnaarsinniarlugit akillu aaqqissuunneqarnerat oqilisaaviginiarlugu. Assersuutigalugu sullitat tamarmik akeqanngitsumik Netbankeqarsinnaanngorput, sullitanullu arlalinnut kontomut akiliut atorunnaarsinneqassaaq.
”Akiliutit akigititallu ataavartumik naliliiviginiarsariuartarpagut sullitatsinnut pitsaasunik unammillersinnaasunillu periarfissaqartitsillutalu akeqartitsiniarluta. Tassunga atatillugu akiliutit arlallit atorunnaarsippagut. Assersuutigalugu sullitat tamarmik akeqanngitsumik Netbankimik atuisinnaanissaat aalajangiupparput. Naak allannguutit bankimut aningaasartuutaagaluartut isumaqarpugut allannguutit sullitatsinnut privatinut iluaqutaassasut”, Turið F. Arge, pisortaaneq, oqarpoq.
Sullitanut privatinut tamanut Netbank akeqanngitsoq
Kalaallit Nunaanni bankini siullersaalluni BankNordikip sullitanut privatinut Netbank akeqanngitsunngortippaa. Siornatigut bankimi iluanaarutinut pilersaarutitsinni ilaasut akeqanngitsumik Netbankeqarsimapput. Taamaasillutik maanna kikkulluunniit akeqanngitsumik Netbank atorsinnaalerpaat.
”Periarfissaatigut digitaliusut pitsanngorsartuarlugillu inerisartuarniarsarisarpagut, sullitap nammineerluni aningaasaqarnini malinnaavigisinnaaniassammagu isumagisassallu isumagalugit. Assersuutigalugu Netbank sullitatsinnut ulluinnarni pingaaruteqarluinnalersimavoq, piffissallu ingerlanerani sullitatta periarfissat digitaliusut allat atorsinnaalerumaarpaat. Periarfissanik digitaliusunik atuiniarnermi akia akornutaassanngitsoq aalajangiussimavarput, taamaammat aalajangerpugut Netbank sullitatsinnut privatinut tamanut akeqassanngitsoq”, Turið F. Arge, pisortaaneq, oqarpoq.
Akit aaqqissuunneqarnerat oqinnerusoq
Septembarip 1-ianni iluanaarutinut pilersaarut atorunnaarsinneqassaaq. Tamanna isumaqarpoq iluanaarutinut aaqqissuussami ilaasut kortinut akiliutinullu allanut 10%-imik 25%-imillu akilliliivigineqartarnerat atorunnaassasoq. Akikilliliinerit atorunnaaraluartut akigititat suli unammillersinnaalluarput.
Bankimi akit aaqqissuunneqarnerat oqinnerutikkusukkatsigu allannguutit piviusunngortippagut, taamaasillutik periarfissat tamarmik immikkut qanoq akeqarnerat sullitanut ersarinnerussammat. Sullitat iluanaarutinut aaqqissuussami ilaasut ilaanngitsullu assigiinngissusaat ullumi annikeqimmat banki iluanaarutissanut aaqqissuussineq atorunnaarsinniarlugu aalajangersimavoq, akigititat sullitanut privatinut tamanut assigiissikkumallugit aammalu paasiuminarnerutikkumallugit.