Ukiup sisamararterutaani siullermi Bankivik angusarissaartoq
Bankivimmi ukiup sisamararterutaani siullermi naatsorsuutit inernerat ullumi saqqummiunneqarput, niuernikkut ineriartorneq ajunngitsumik ingerlasoq tassani takuneqarsinnaavoq.
”Ukiormanna qaammatini siullerni pingasuni ingerlanerput naammagisimaarutigaarput, pingaarnertullu nuannaarutigaarput Kalaallit Nunaanni sullitat arlallit Bankivik pingaarnertut bankerilersimammassuk. Nunarsuarmi politikkikkut pissutsit nalunarseqqanerat ukiormanna qaammatini siullerni malunnaateqarsimavoq, tamatumalu kinguneranik sullitat mianersornerulersimallutik, ingammik aningaaserinikkut aalajangigassat annertuut eqqarsaatigalugit. Taamaakkaluartorli realkreditimik taarsigassarsisitsinerit uninngasuutillu uatsinni annertuseriarsimapput,” Turið F. Arge, Bankivimmi pisortaaneq, oqarpoq. Ukiup sisamararterutaasa siullianni Bankiviup Kalaallit Nunaanni ingerlatsinerata naatsorsuutaasa inernerat akileraarutit sioqqullugit 13 mio. kr.-iupput, tamannalu 2024-mi piffimmut tassunga naleqqiullugu siuariaataavoq.
Uninngasuutinut erniat pitsaasut
Naak ukiuni kingullerni erniat appariartorsimagaluartut sullitavut erniagissaangaatsiarlutik aningaasaatitik uninngatissinnaavaat, tamannalu arlalinnit atorluarneqarsimavoq. Taamaasillutik Kalaallit Nunaanni bankimi sullitat uninngatitaat ukiormanna qaammatini siullerni pingasuni 8%-imik amerleriarsimapput, siorna piffimmut tassunga naleqqiullugit.
Periarfissat digitaliusut nutaat sullitanit atorluarneqarput
2024-p naalerneranili Bankivimmi sullitat netbankikkut nittartakkatigulluunniit nammineerlutik ileqqaakkanut kontonik erniagissaartunik assigiinngitsunik pilersitsisinnaalernikuupput.
”Takusinnaavarput periarfissaq digitaliusoq tamanna sinerissami sullitatta amerlasuut atorluarsimagaat, nammineerlutillu ileqqaakkanut kontonik pilersitsisartut amerliartuinnartut. Tamatuma takutippaa aningaaserinermut tunngasut ulluinnarni ajornanngitsumik sukkasuumillu isumagisinnaaneri sullitanit iluarineqartoq,” Turið F. Arge oqarpoq.
Sullitanut periarfissanik digitaliusunik pitsaasunik aallutaqarnitta saniatigut ukiup sisamararterutaasa siullianni illoqarfinni assigiinngitsuni sullitanut aaqqissuussinerit ingerlassimavagut, taakkulu assorsuaq ornigarneqarsimapput. Aaqqissuussinerni taakkunani kikkulluunniit bankip siunnersortaanit siunnersorneqarnissaminnut periarfissinneqarsimapput, sammisassallu assigiinngitsorpassuit tikinneqartarsimallutik, soorlu aningaasaqarnermik aaqqissuussineq missingersuusiornerlu, illusineq, illumik aserfallatsaaliuineq, aningaasaliinerlu.
Naatsorsuutit inerneri pingaarnersiukkat
- Akileraarutit sioqqullugit inernerat tassaavoq 76 mio. kr.
- Appartitsinerit sioqqullugit ingerlatsinerup inernera 56 mio. kr.-iuvoq
- Bankip taarsigassarsisitsinera 9,3 mia. kr.-iuvoq
- Bankip realkreditimik taarsigassarsisitsinera 2,9 mia. kr.-iuvoq
- Bankip uninngatitai 10,3 mia. kr.-iupput
- Siulersuisut naatsorsuutigaat ilanngaatissat ilanngaatigereerlugit 2025-mi naatsorsuutit inernerat katillugit 210-240 mio. kr.-ip nalaaniissasoq
Paasissutissat sukumiinerusut
Rúna N. Rasmussen, pilerisaarinermut pisortaq tusagassiutinullu attavissaq, tlf.: +298 23 04 78