Katisimalluni aningaasaqarneq
Katilerninni pilluarit – imaluunniit immaqa katerlaajuvusi. Aningaasaqarnikkut iluatinnartortai eqqaamagisigit. Tassami angerfigeqatigiinnissinni aningaasaqarnikkut eqqartuussiveqarnikkullu atukkasi ilaatigut allannguivigineqassapput. Allannguutit tamakku maanna naatsumik nassuiassavagut.
Piginneqatigiinneq
Katikkussi piginneqatigiinneq ingerlaannaq atuutilissaaq – tamatumali atuunnera aatsaat avinniaraanni pingaaruteqalertarpoq. Avinnermi ilanngaatissat ilanngaatigereerlugit pigisasi avittussaassavasi, tassa pigisat akiitsunik ilanngaavigereerlugit nalingi. Tassa imaappoq annerusumik pigisaqartoq aapparminut akiliissaaq, avinnermi tamarmik pigisaat amerlaqatigiilersillugit.
Piginneqatigiinnissarsi kissaatiginngikkussiuk aappariit aalajangersagaannik pilersitsisinnaavusi, tassanilu immikkut pigisaqarnissarsi isumaqatigiissutigalugu.
Akiitsut
Tunngaviusumik pissutsit malillugit nammineq akiitsutit taamaallaat akilertussaavatit – aapparpit akiitsui pinnagit (ilaannikkulli pissutsit allaasarput). Nammineq akiitsorisat taamaallaat akilertussaagaluarlugit ilaatigut aapparisap akiitsuinik akiliisussanngorneq pisarpoq, soorlu averusernermi, avinnermi imaluunniit aapparisap toqukkut qimagunnerani – tassunga pissutaavoq piginneqatigiinneq, qulaani allaaserineqartoq. Nuliaasoq assersuutigalugu 1 mio. kr.-nik pigisaqaruni, uiusorlu 1 mio. kr.-nik akiitsoqarluni, taava nuliaasup uini 500.000 kr.-nik akiliivigisussanngussavaa.
Advokatimut ikioqqugitsi
- Advokat saaffigalugu uku oqaluuserineqarnissaat innersuussutigaarput: aappariit aalajangersagaat, immikkut pigisat kiisalu testamente.
- Advokaterpassuit ”Ilaqutariinnik misissuineq” ingerlattarpaat, ilaasa akeqanngitsumik imaluunniit 2000-3000 kr. missaani akeqartillugu. Taamatut misissuinermi ilissi ilaqutariittut inatsisit malillugit qanoq inissisimanersi misissorneqartarpoq.
Tamarmik qitornaat immikkullu qitornarisat
Immikkut qitornaqarluni qatanngutissariilersitsinermi kingornussinissamut tunngatillugu taakkua inatsisitigut malillugit allaanerusunik atugaqarnissaat eqqumaffigisariaqarpoq. Tamarmik qitornaat taavalu immikkut qitornarisat tassani apeqqutaatinneqartarput. Tamarmik qitornaat angajoqqaat tamaasa kingornussivigissavaat, immikkulli qitornarisat angajoqqaavitsik kisiat kingornussivigissavaat. Taamaattorli testamentiliortoqarsinnaavoq, assersuutigalugu qitornat tamaasa naligiimmik kingornussisinniaraanni, imaluunniit nammineq qitornarisat immikkut pissaqartinniaraanni.
Arlarsi suliffissaaruppat
Katikkussi immissinnut pilersuisussanngortinneqassaasi. Tamanna ilaatigut pisortanit aningaasarsinissamut itigartitsissutaasinnaavoq, assersuutigalugu suliffeqanngitsutut tapisinissamut itigartitsissutaalluni. Taamaammat peqatigiillusi aningaasaqarnissi qimerloornissaa innersuussutigaarput, arlarsi suliffissaarutissagaluarpat aningaasatigut qanoq atugaqarnissarsi paasiniarlugu.
Soraarnermusiaqarnissamut ileqqaakkat
Soraarnermusiaqarnissamut ileqqaakkat qanoq aaqqissuunneqarnerat apeqqutaalluni avinnermi ileqqaakkat ilaannikkut avinneqartussanngortarput. Aaqqissuussinerit inuunermik piumasaqaatitaqartut aalajangersimasumillu akuttussusilimmik tunniunneqartartut (ass. erniat inuunerpit sinnerani pissarsissutigisassat (livrente)) avinnermi avinneqartussanngorneq ajorput. Ileqqaakkalli inuunermik piumasaqaatitaqanngitsut (ass. kapitalpensioni kiisalu soraarnermusiat assigiiaartumik agguataakkat nammineq katersarisimasat (ratepension)) avinnermi avinneqartussanngortarput.
Akileraarutit eqqaamallugit
Katikkussi aningaasaqarnikkut atukkassi ilaat kattunneqassapput - assersuutigalugu peqatigiillusi akileraartinneqalissaasi. Tassa imaappoq personfradragit sinneqartoorutillu arlassi atorsimanngisaat aappaanut nuunneqarsinnaapput. Taamaakkaluartorli tamassi immikkut nammineerlusi nalunaarsuiffimmik immersuisartussaavusi.
Uatsinni periarfissatit paasisaqarfiginerorusuppigit?
Uunga sianerfigitigut