Meeraq aningaasat pillugit oqaloqatigisaruk

Meeqqat inersimasuusugut tarrarsorfigisarpaatigut. Aningaasanik atuinerup tungaatigut aamma ileqqupalaaqarutta imaluunniit ileqqorissaarutta malinninnissaat naatsorsuutigisinnaavarput.

Meeraq siusissukkut aningaasanik soqutiginnilersarpoq, aningaasanillu atueriaatsinnut aamma alapernaassinnaasaqaat. Angajoqqaatut sunniuteqangaatsiartussaavutit. Taamaammat innersuussutigaarput meeraq mikineranit aningaasat atuinerlu pillugit oqaloqatigisassagit. Taamaasillutit siunissaq pillugu meeraq piareersassavat, aningaasaqarnikkut ileqqorissaarlunilu ingerlalluarnissaanut ilinniartillugu.

Meeraq sipaarnermik ilinniartiguk

Meeraq atualereersimappat pisaarerusutaanik pisinissamut nammineq ileqqaagaqarnissaanut ilinniartissinnaavat. Sipaarneq nuannersuusinnaavoq - ingammik ilungersuutigisimasat imminut akilerluaraangata. Eqqaamassajunnarsivammi illit nammineq katerseriarlutit cykelitaaqqaaravit, imaluunniit inuusamik biileerartarfimmilluunniit piseqqaaravit.

Meeraq ileqqaakkanut kontoqartikkukku tassuuna ileqqaagaqarneq aningaasaqarnerlu pillugit ilinniartissinnaavat. Nalliussimalluni oorinnaani, kaasarfimmiuutinilu tassunga ileqqaarlugit erniortissinnaassavai.

Naatsorsuut ataaniittoq atorlugu misileraaniaritsi, taava takussavarsi qaammatit tamaasa qanoq annertutigisumik - annikitsigisumilluunniit - ileqqaagaqaruni assersuutigalugu cykelit pilerigisani pisiarisinnaassanerai.

Qitornavit internetikkut uukapaatinneqarnissaa pinaveersaartiguk

Ajoraluartumik meeqqat aamma internetikkut aningaasat tungaasigut uukapaatinneqartarput, aningaasanik annaasaqarlutik allatigulluunniit pinerluttuliorifigineqarlutik – allaat pinerlunnikkut aningaasarsianik malunnarunnaarsaanermut atatillugu.

Angajoqqaajuguit pingaaruteqarpoq meeraq internetikkut aningaasanut tunngatillugu qanoq pissusilersortarnissaq pillugu oqaloqatigissallugu. Assersuutigalugu eqqaasassaapput paasissutissat inniminartut allanut tunniutinngisaannarnissaat, aammalu nioqqutit akii uppernanngingajattumik akikigisassaappata immaqa pisiarinngikkaanni pitsaanerussasoq, unammisitsinerillu eqqugassartaat annertoorujussuullutik iluatinnarpallaangajappata immaqa mianersuussassaasut.

Nittartagaq sikkerdigital.dk alakkaruk, tassaniipput meeqqat aningaasanut tunngatillugu internetikkut isumannaatsumik pinissamut ilitsersuunnissaannut siunnersuutissarpassuit.

Meeqqat aningaasaqarnerlu pillugit siunnersuutit:

• Meeraq kaasarfimmiunik tunisaruk, taava pingaarnerutitaminik tulleriissaarineq ilinniassavaa
• Sunut tamanut akissaqanngikkaluaraanni ajunngilaq. Meeraq oqaluttuussinnaavat inuuissiornissaminut juullimulluunniit pinnguaq kissaatigisinnaagaa - imaluunniit nammineq katerseriarluni pisiarisinnaagaa.
• Kortit aningaasallu aggorsimasut assigiinngissutaat pillugit meeraq oqaloqatigisaruk. Aningaasat pappilissat møntillu takutikkit, paasitillugillu aamma kortimik akiliigaluaraanni atorsinnaasat killeqartut.
• Meeraq akiliissutaasumik korteqarpat isumannaallisaaneq pillugu oqaloqatigiuk, pinkode pillugu internetimilu pisineq pillugu.
• Ulluinnarpalaartunik assersuusiorlutit 10 kr.-imut 100 kr.-imulluunniit sumik pisisoqarsinnaaneranik nassuiaasarit. Immuk iffiallu meeqqat paasiuminarnerutittarpaat, illumik attartorneq angallammullu taarsigassarsiat takorlooruminaannerulaartarput.
• Meeraq niuernermik tunisinermillu ilinniartissinnaavat atorunnaakkaminik tuniniaasillugu, assersuutigalugu loppemarkedertillugu.
• Meeqqat anginerit missingersuusiornermik ilinniartikkit. Tassuuna aningaasat sumut atorneqartarneri akiligassallu assigiinngitsut qanoq akeqartarneri takorlooruminartinnerussavai. Inuusuttuaqqanut missingersuusiorfissaq Råd til Pengep nittartagaanut aaneqarsinnaavoq.