Nordatlantisk Gymnasieklasse – Ivaanap isaanit isigalugu
2019-imi aasami Ivaana Olsen Rasmussen Nordatlantisk Gymnasieklassemiinnissaminut atatillugu legatinnappoq. Una atuarsinnaavat tassanilu aamma Danmarkimi ilinniartuuneq paasisaqarfiginerulaarlugu.
1.g Danmarkimi ingerlanneqarpoq, kingorna ilinniartut ukiup affaa Savalimmiuni ukiullu affaa Islandimiillutik 2.g ingerlatissavaat. Ukiut pingajussaanni Kalaallit Nunaannukassapput, ilinniarnertillu tassani naammassissallugu.
Ivaana massakkut Helsingemi najugaqarpoq, maannalu Atlantikup Avannaani Ilinniarnertuunngorniarfimmi NGK-mi semesterit aappaat ingerlallugu.
Misigisimasai uani atuarsinnaavatit:
Ilinniarnertuunngorniarfimmi NGK-mi semesteri siulleq
Namminiilerpunga
2019-imi apriilimi periarfissinneqarpunga Nuummi ilinniarnertuunngorniarfimmi aallartissinnaallunga imaluunniit atlantikup avannaani ilinniarnertuunngorniarfimmi nunani sisamani ilinniarsinnaallunga. Kingusinnerpaamik maajip 1.-ni aalajangertussaallunga nalorningaarama toqqaanialerama iluaqutissat akornutissallu allattortariaqarsimavakka. Aalajangerama inuttut alloriarujussuartussanngorpunga: NGK toqqarpara, nammineq ineqarlunga nammineerlunga inuusussanngorlunga, nammineq igasarlunga, piffissaq nammineq aquttussanngorlugu, ilinniagassakkalu, errorsinissallu nammineq isumagisussanngorlugit. Nunani assigiinngitsuni sisamani ilinniartussanngorlunga, nunanit assigiinngitsunit sisamaninngaanneersunik ilinniaqateqartussaallunga, nunanilu allani assammik arsarneq ingerlassinnaalerlugu. Qujamasuutigaara siornatigut nammineq igasarlungalu, errorsisarlungalu, niuerniartarama, piffissarlu nammineq aquttarlugu – kisianni siornatigut taamaakkaluarlunga ilungersorfeqaraangama angajoqqaannit oqilisaavigineqartarpunga.
Aallartisarneq – ilinnialeqqaarnermi atuarfik aaqqissuussilluarsimavoq
-
Atualertinnata tamattaalluta ulluni marlunni immikkut sammisaqartitaavugut – immitsinnut ilinniarluta, illoqarfillu Helsinge ilinniarlugu
-
Apeqqutissaqarutta, pakkunneqalaarnissamilluunniit pisariaqartitsigutta pingasunik mentoreqarpugut orneriaannarnik
-
Eqimattat sunngiffimmi aaqqissuussisartut pingasut – soorlu nalukkiarnissamik, inuusuttut illuannukarnermik, filmeriarnermik, allanilluunniit
Ukiup ingerlanerani atuarfik aaqqissuussillattaasarpoq, tassuuna immitsinnut ilikkarluarnerusarpugut.
- Illuaqqamut unnuiartorneq, tassani erinarsoqattaarluta pinnguaatersorluta nerilluarlutalu nuannisaqatigiittarpugut.
- Ulloq timersorfik – atuaqatigiiaarluta immitsinnut assigiinngitsutigut unammisaqattaarfik.
- Decembarimi weekendini juullerpalaartitsisarput, juullikkunni ileqqutsinnik saqqummiisilluta
- Orpippassuarni kanomik angalaneq, tasermi nalunnguarneq, hotdogsitorneq nuannisaqatigiinnerlu (naa, kanomiinnissannut nangiarsuaarama! Kisianni qununera ajugaaffigaara)
- Pingasunngornikkut ullaakkut atuarfimmi ilinniartut tamarmik ataatsimoortinneqartarput
- Immikkut sammisaqarluni orpippassuarnukaqatigiinneq – tassani hiphoppertartutut atisalersornissaq atuaqatigiilluta toqqarparput
- Atuarfimmi festernerit – lyskrydsfest, atuarfiup nalliuttorsiornerani ”Ude af kontrol” tusarnaartitsipput, kiisalu ilinniartunut festernerit nalinginnaasut.
Siullerpaamik NGK-mi atuartuuvugut
Nordatlantisk Gymnasieklassemi atualertuni siullerpaavugut, taamaammat tusagassiortorpassuit aamma soqutiginnillutik apersuisarsimapput. Atuaqatigiilluta tamatta sanilitsinnut neriartoqqusaallutalu juullerpalaartumik neriartoqqusaanikuuvugut. Ilaqutariiaat angerlarsimaffimminnut qaaqqusarsimavaatigut, angerlarsimaffippalaartumi isersimaartilluta iluatatsillutalu, tamannalu assut qujamasuutigaarput.
Novemberimi atuaqatigiilluta tamatta Islandimi nunat avannarlerni oqaatsit pillugit ataatsimeersuarnermut qaaqqusaavugut. Nuanneqaaq. Tassani aamma ilinniartut nunanit avannarlerninngaanneersut allat naapippagut, aammalu semesterit sisamaanni Islandimukarnissatsinnut piareersalaarsinnaasimalluta avatangiisissagut paasisaqarfigilaarlugit. Sukuutserlutalu takornariarpugut aamma, puilasunilu uunartuni kinisimaarujoorluta.
NGK-mi kalaalertaasugut DR-ip Kalaallit Nunaannut juullimi pilluaqqusineranut peqataasinneqarpugut. Tassanilu erinarsoqatigiinni Nittaallani peqataalluta tussiutitta pingaarnersaasa ilaat ”Guuterput” tussiarlugu. Taama misigisaqarnissara siornatigut takorluunngisaannarsimavara – kisianni nuannerluinnarpoq.
Aatsaat semesteri siulleq taamaallaat pereeraluartoq misigisimasagut amerlaqaat. Atuaqatigiit maanna 23-uvugut, atuaqatigisimasatsinnilu unittoqaraangat aliatsannartuaannarpoq, assigiinngitsunik peqquteqarlutik unittariaqarsimapput.
Ilinniarnerup ingerlanera
Meeqqat atuarfianni karakteeritigut angusarissaarnerpaasarnikuullunga maanna 4-7-10 angusalernikuullugit malugusunnarpoq. Inuttut uteriittuuvunga unammillerneqarnissamik nuannarisalik. Kisianni ilinniakkat tungaasigut unammillernartut ilaannikkut imaannaanngittaqaat. Atuarfimmi malinnaaginnavittariaqartarpugut, taamaanngippat sammisavut paasiuminaattaramik, aamma atuarnerup kingorna ilinniagassagut imaaginnavittarput. Atuanngitsuunngivinnissaq anguniagariuarsimavara. Taamaalioruma ingerlalluarnissara qulakkeernerussagakku.
Gribskov Gymnasium atuarfigisarput Eliteidrætsgymnasier-ini ilaasortaavoq, tassa imaappoq tamaani ilinniarnertuunngorniaatigaluni timersornikkut qaffasinnerpaamik ingerlatsisoqarsinnaavoq. Taamatut periarfissaqartitsinera atorluarlugu novemberimi Nuummi holdit siuarsarneqartut sungiusarneranni peqataavunga. Piffimmi tassani atuanngitsoornera atuarfiup akuerisamik atuanngitsoornertut nalunaarsorpaa. Ajoraluartumilli juullikkunni illoqarfigisanni juullisioreerlunga utilerama silarlunnera pissutaalluni timmisartoq aallanngitsoorpoq, taamaasillungalu ajoraluartumik atuanngitsoorlunga, hajja.
Atuarfimmiittut assiliseqatigiinnerat
DR-ip Kalaallit Nunaannut Juullimi Pilluaqqussutaa
Aningaasaqarneq
Qaammammut ilinniarnermusiarisarpakka 4.800 kr. Ineqarnermut akiliutigisartagara 4.400 kr.-iummat aningaasartuutinut allanut sinneruttut soorlu mobiltelefonimut, internetimut, nerisassanut, eqqiaanermut, fitnessimut timersornermullu akiliutinut ikittuarannguusarput. Pisariaqartitagut tamaasa nammineq isumagisussaavagut, equutissianit neqinut. Kisianni BankNordik-legati pissutaalluni qujanartumik aningaasartuutissannut akissaqartarpunga.