Aningaasaqarneq torersoq
Ajunngilarmi ima oqaannarlata: Asannerujoorluta aningaasaqarneq eqqartussallugu eqianartaqaaq!
Kisianni eqqartorneqartariaqarpoq. Innersuussutigaarpullu ineqatigiilersinnasi aningaasaqarnermut tunngasut eqqartoreernissaat - taamaasillusi aappassi aningaasaqarnera, aningaasanullu isiginnittaasia paasissavarsi, minnerunngitsumillu ajortoqariataassagaluarpat qanoq iliornissarsi nalussanagu. Soorlu arlarsi ajutuussagaluarpat, imaluunniit siunissami arlaanni najorunnaassagaluarussi.
Aningaasaqarnersi kattunneqarpat
Periutsit assigiinngitsut uku peqatigiilluni aningaasaqarnermi atugaagajupput.
- Aningaasaqarnersi 100%-imik ataatsimoorullugu, tassa isertitasi tamarmik ataatsimut kattullugit aningaasartuutigisasilu aliikkutassanullu atuinisi tamaasa ataatsimoorullugit akilertarlugit
- Marluullusi peqatigiillusi aningaasartuutit avillugit akilertarlugit. Aningaasaatissi sinneri nammineq immikkut kaasarfimmiussatut tigummillugit.
- Immikkut assigiimmik kaasarfimmiussaqarlusi - taava aningaasartuutit sinneri kattullugit peqatigiillusi aningaasartuutigisartakkassinnut aliikkutassanullu nakkartarlutik
Peqatigiilluta aningaasartuutinut peqatigiilluta kontoqarta
Periutsit tamarmik iluaquteqarlutillu ajoquteqarput. Ilissinnut sorleq pitsaanerussanersoq nammineq aalajangertariaqarparsi. Ilissi isumarsi tassani aalajangiisuussaaq, assersuutigalugu aningaasarsinerusartoq kaasarfimmioqarnerusassanersoq immikkullu soqutigisassinnut qanoq atuitigisinnaanerlusi nammininnguaq aalajangigassaraasi.
Tamakkuli apeqqutaatinnagit tamatigut innersuussutigisarparput aningaasartuutinut aalajangersimasunut peqatigiillusi kontoqarnissarsi, Betalingsservicelu atorlugu aalajangersimasumik aningaasartuutigisartakkasi tassannga akilertassagisi - torernerullunilu toqqissisimanarnerussammat. Aamma nerisassanut kontoqarsinnaavusi, ileqqaagaqaqatigiillusilu naatsorsuutigisimanngisamik aningaasartuutinut imaluunniit angalanissamut sinnattuaqissutigisassinnut.
Missingersuusioritsi
Ingillusi aningaasartuutigisartakkasi tamaasa allattorsigit - peqatigiillusi aningaasartuutit, soorlu ineqarnermut, sillimmasiinernut, tv-mut internetimullu akiliutinut il.il. aammali immikkut aningaasartuutigisassinnut, soorlu linsinut, sunngiffimmi soqutigisanut assigisaannullu. Taamaasillusi aningaasartuutissi suunerat ersarissumik takussavarsi, aningaasaqarnissilu qanoq ingerlannissaa aalajangersoruminarnerussalluni.
Arlarsi tamassiluunniit immikkut meeraqarfimmit allamit meeraqarussi paaqqinnittarfinnut, sunngiffimmi sammisanut, meeqqanut akiliutit atisallu akilerneqarnissaat aalajangertariaqassavasi. Angajoqqaaviusoq kisimi tamakkuninnga akiliisassava, imaluunniit "anaanassaq" "ataatassarluunniit" aamma akileeqataasassava? Taavami siunissami pingaartorsiorfiit qanoq akilerneqassappat, soorlu apersortinneq, efterskole, nunanut allanukarneq, biilersinnaanermullu allagartaq?
Aapparisat akiitsoqarpat
Najulersinnasi arlarsi akiitsorsimappat tamanna aamma inooqatigiillusi aningaasaqalernissinnut atatillugu eqqartugassaassaaq - tassami sorleq akiitsorsimanersoq apeqqutaannngilaq, annertuallaamik akiitsorsimaneq siumut takorluukkassinnik piviusunngortitsinissamut akornutaalersinnaavoq. Innersuussutigaarput akiitsut akilersornissaat peqatigiillusi pilersaarusiussagissi.
Katissimaneq katissimannginnerluunniit apeqqutaalluni akiitsorsimanermut akisussaatitaanermi apeqqutaatinneqassapput.
Aapparisat najulerukku pisortanit ikiuutit unitsinneqassapput
Aapparisallu najulerussi pisortanit ikiuutinut kinguneqassaaq, soorlu boligsikringimut, akeqanngitsumik paaqqinnittarfeqarnermut, immikkut meeqqanut ikiuutinut utoqqalinersiutinullu. Tamakku ilaatigut unitsivinneqartarput, ilaatigullu annikillisarneqartarlutik.
Uatsinni periarfissatit paasisaqarfiginerorusuppigit?
Uunga sianerfigitigut