Nammineq initaarneq

Namminiileqqaarneq pissanganarlunilu nangiarnarsinnaavoq. Namminiileraluarlutilli kisimiinngilatit! Aqqutaani ikiorusuppatsigit, taamaammat initaarninnut atatillugu tulluarnissat anguniarlugu siunnersuutinik katersisimavugut.

Missingersuusiorit

Aningaasaqarnerup aaqqissuulluarnissaa pingaaruteqarpoq, taava qaammatip naalernerani suutaarussimasassanngilatit. Missingersuusioruit makku malinnaavigiuminarnerussapput:

• isertitatit (ilinniagaqarnersiutit/SU, akissarsiat, ineqarnermut tapiissutit il.il.)

• aalajangersimasumik aningaasartuutigisartakkatit (ass. ineqarnermut, kiassarnermut, oqarasuaammut, fitnessimut sillimmasiinernullu)

• kiisalu aningaasartuutit nikerartut (atisat, nerisassat, kaffisoriartortarnerit assigisaallu).

Missingersuusiorfissaq immersugassaq atorlugu aallartissinnaavutit. Qaammammut isertitat aningaasartuutillu tamaasa immersoreerukkit qulaani talerpiatungaani takussavat aningaasartuutinut aalajangersimasunut kontomut qaammatit tamaasa qanoq amerlatigisunik nuussisassanerlutit. Taamaasillutit aningaasartuutit ukiumut tamarmut siammartissavatit, akiligassitserujussuarlutillu tupaallatsinneqanngitsoorlutit. Tassa illit aningaasat aqussavatit - aningaasanit aqunneqarnak.

Pappialaatitit aaqqissuutikkit

Pisariaqanngitsutut isiginarsinnaavoq eqianarlunilu, kisianni akiligassaatitit, Akileraarnermut pisortaqarfimmit ukiumoortumik nalunaarut, akissarsiat allagartaat assigisaallu torersumik aaqqissuutilaarigit. Aaqqissuussineq qarasaasiami e-Boksimi pisinnaavoq, imaluunniit pappialanngorlugit mappemut. Taava pisariaqartileraangakkit naniuminarnerussapput - soorlu bankimi ataatsimiileruit aningaasaqarnerit pillugu paasissutissanik pisariaqartitsilerutta.

Nuunnerit nalunaarutigiuk

Inuit nalunaarsorsimaffiannut nuunnerit nalunaarutigissavat - sullissivik.gl-imi paasisaqarnerusinnaavutit.

Sillimmasiineq

Inuusuttorpassuit sipaarumallutik pequtitik sillimmaserneq ajorpaat. Tillinniarfigitissagaluaruit, ikuallattuussaguit allalluunniit pigisaanik aseruisuussagaluaruit tamanna akissaajaataangaatsiarsinnaavoq. Eqqaasarput kingulleq ilanngupparput pequtit sillimmasernerannut akisussaaffimmik sillimmasiineq ilaammat, allap pigisaa inaaniillutit atorsimalluguluunniit aserortuussagukku taarsiivigitissinnaallutit. Pequtinik sillimmasiinerup saniatigut ajutoornissamik sillimmasiinissaq innersuussutigaarput.

Ilinniartunut sillimmasiineq taakkununnga tamanut atuukkajuttarpoq akikittarlunilu - qaammammut tallimariarlutit kaffisinertut akisutigipajaaginnarpoq.

Ileqqaagaqarit

Aasaru feeriarnissannut, kammassuavit inuuiani pissaanut, smartphone natermut nakkaagukku... tamarmik akeqarput! Taamaammat pilersaarusianni qaammatikkaartumik feerianut, tunissutinut naatsorsuutigisimanngisanullu ileqqaagaqartarit.

Ileqqaakkat aamma angalanissamut, biilisinissamut, illusinissamut allamulluunniit aallarniutaalluarsinnaavoq. Ileqqaagaqaliaaruillu kissaativit piviusunngornissaat eqquutiaarnerussaaq, soorlu biilinik illumilluunniit pisillutit.

Qanoq annertutigisumik ileqqaagaqarsinnaassanerlutit misissoriarlugu naatsorsuuterput misiliguk - qaammatit tamaasa annikikkaluamik ileqqaagaqartaruit angusaqarsinnaaqaatit.

Sapinngisamik akiitsornak

Akiitsorneq akisoorsuusinnaavoq, ingammik taarsigassarsigasuarneq. Taarsigassarsigaangavit tamatigut erniat akiliutillu aningaasartuutaasarput. Ilaannili aningaasaqarnikkut suut tamaasa kaaviiaartikkumallugit akiitsorneq pisariaqartarpoq. Ataatsikkut aningaasanik amerlasuunik pisariaqartitsissaguit akiitsortinnak oqaloqatiginiarisigut - taava periarfissamik ilinnut aningaasaqarninnullu tulluarnerpaasumik nassaarniarsarissaagut.