MobilePay – ajornaatsumik isumannaatsumillu aningaasanik nuussineq

MobilePay atorlugu isumannaatsumik ajornaatsumillu smartphone atorlugu aningaasanik nuussisinnaavutit, tigusisussap kontonormua paasinngikkaluarlugu, MitID-lu atornagu. MobilePay atoraanni kontonormu mobilnormumut atassuserneqartarpoq – taamaammat aningaasanik nuussiniaruit tigusisussap mobilnormua paasigukku naammappoq. Aamma mobilnormut kisiat tunniullugu allanit aningaasanik nassinneqarsinnaassaatit.

MobilePay ima atulissavat

MobilePay atulerniarukku CPR-normoqassaatit MitID-qarlutillu. Aamma Danmarkimi mobilnormumik Nunatsinni mobilnormorisannut atassuserneqartussamik pilersitsissaatit. Tamanna ajornanngilaq, Tusass-abonnementeqaruit akeqanngitsumik pilersitsisinnaavutit. Tusass-imit Danmarkimi mobilnormussannik ugguuna innimminniisinnaavutit. Normumik inniminniinerit naammassigukku normussat ingerlaannaq paasissavat, Tusass-illu Nunatsinni Danmarkimilu normutit ataqatigiisissavai.

Taava MobilePay-app-i aassavat, App Store imlt. Google Play aqqutigalugu, atulersinnissaanullu ilitsersuutitaa skærmimi nuisoq malillugu. Mobilnormut toortaqquneqarpat Danmarkimi normut atussavat – Nunatsinni normut atornagu. Atulernissaanut MitID atussavat – taamaalioreeruillu aningaasanik nuussinissannut nassitsinnissannullu piariissaatit. MitID ataasiaannarlutit atussavat, tassa MobilePayip atulersinnerani.

Ulluinnarni aningaasat tigummiat atorlugit akilertakkatit MobilePay atorlugu maanna isumagisinnaalerpatit. Soorlu neriartorsimagussi, kaffisisimaguit, filmeriarnermiluunniit isissutissanik akiliillutit akiliussigallarsimaguit ilatit ingerlaannaq oqarfigisinnaavatit, tassuunalu akiliisillugit. Aamma MobilePay app-imi mobilikkut akiliisimanitit aningaasallu ikineqarsimasut ajornaatsumik malinnaavigisinnaavatit.

Aningaasanik qanoq amerlatigisunik nuussisinnaappat?

MobilePay atulerukku ullut tamaasa 10.000 kr. tikillugit mobilit aqqutigalugu akiliutigisinnaavatit – kontonni akissaqarallartillutit. Pisiniarfinni arlalinni aamma MobilePay atorneqarsinnaalernikuuvoq, taamaasillutillu pisinialeraangavit mobilit nassarukku naammassinnaalluni.
Aamma mobiltelefoneqarnermut aviisinilluunniit pisartagaqarnermut akiliutit MobilePay atorlugu akilerneqarsinnaapput, aningaasanillu tunniussiniaruit pilluaqqussutitalerlugilluunniit tassuuna nuunneqarsinnaallutik. Allarpassuarnik aamma periarfissaqarpoq, MobilePay sumut atorsinnaanerlugu ugguuna paasisaqarnerusinnaavutit.