Sulisut
Sulisitsisuulluni pikkorissunik eqeersimaartunillu sulisoqartuarnissaq nutaanillu ornigarneqarnissaq pingaaruteqarluinnarpoq. BankNordikimi sulisutta aningaasarsiornikkut naleqarnerulersitsiviusumik ingerlatsineq pikkoriffigalugulu piumassuseqarfigisariaqarpaat, taamaattumik suliffeqarfiup iluani sulisut atugarissaarnissaat pikkorissarnissamullu periarfissaqartuarnissaat sulissutigiuarparput.
Nalunngilarput suliffiup iluani avataanilu inuuneq imminnut akulerutsinnagit oqimaaqatigiissumik ingerlanneqartussaasut, aamma nalunngilarput peqatigiissuit BankNordik siunissami aningaaserinerup silarsuaani ingerlalluassappata, sulisut atugarissaarlutillu peqqissuunissaat pingaaruteqarluinnartoq. Sulisutsinnut tunngatillugu suliniutivut ataani paasisaqarfiginerusinnaavatit.
Ilorrisimaarneq peqqinnerlu
Bankimi sulisut suliffimminnik nuannarinnillutillu tulluusimaarutiginninnissaat pingaarutilipilussuuvoq. Sulisuvut pingaarnertut isumalluutigaavut, taamaammat suliffeqarfiup iluani pissutsit nuannersuutikkumallugit siuarsaajuarpugut suleqatigiit akornanni nukittorsaataasinnaasunik aaqqissuussisarluta.
Ukiumoortumik misissuineq
BankNordikimi ukiumoortumik suliffeqarfimmi kulturi misissorneqartarpoq, tassanilu sulisut pissutsinik aaqqissuussinermut tunngasunik nalileeqquneqartarput. Suliffeqarfimmi kulturip misissornerani eqqumaffigineqartut ilaat tassaavoq pingaartitarineqartut timitalerlugit ingerlanneqarnersut, aammalu periutsit suut siumut aallutassatut piukkunnarnersut. Misissuineq siulleq 2016-imi suliffeqarfitsinnut attaveqanngitsumit suliarineqarpoq, 1-imit 5-imut angusaqarsinnaalluta 3,9-mik inernilerneqarpugut. Angusarput naammaginartutut nalilerparput, tamannalu 2017-imi misissuinermut sanilliussassaqqissutut nalilerparput.
Suliffik nuannersarlugu aamma assigiinngitsunik aaqqissuussillattaasarpugut. BankNordikimi peqqissuuneq tapersersorparput. Immikkoortortaqarfitsinni tamani naatitanik nerisassaqartitsisarpugut, aamma timigissartarfiit isumaqatigiissuteqarfigisarpagut sulisutsinnut orniginarnerulersillugit.
Bankimit pingaartipparput ammasumik eqaatsumillu periuseqarnissaq. Sulisut tamarmik, arnaagunik angutaagunilluunniit, pikkoriffitik atorluarlugit qanorluunniit angusaqarsinnaallutillu akisussaaffeqarsinnaatitaapput. Taamaakkaluartorli bankimi naligiissitaanermut tunngatillugu anguniagaraarput aqutsisut iluanni angutit arnalluunniit 40% ataassimassanngikkaat. 2016-ip naalernerani aqutsisut suiaassusiisa agguataarnerat (siulersuisut minillugit) imaappoq arnat 40% angutillu 60%, taamaasillunilu bankip anguniagaata iluaniilluni.
Ilisimatusarneq siuarsaanerlu
Piginnaasaqarluarneq unammillersinnaanermut pingaaruteqarluinnarpoq. Taamaattumik BankNordikimi sulisutta piginnaasatigut ineriartortittuarnissaat suliniutigisarparput, tassuunalu bankip siumut isumalluuteqarluarnissaa qulakkeertarlugu, aammali sulisut siunissami periarfissaqarluarnissaannut ikiortarlugit. Ukiut tamaasa BankNordik ilinniarnermut aningaasaliingaatsiartarpoq, nutaanik ilinniartunngortitsilluni aammalu atorfeqareersunut ilinniaqqinnissanut periarfissiisarluni. Assersuutigalugu HD 1. del aningaaserivimmiortatsinnut tamanut innersuussissutigisarparput.
NordikKompetence
BankNordikimi aamma nutaaliornermi siuttoorusuppugut. Sulisutta ineriartortittuarnissaat siunertaralugu ’NordikKompetence’ periarfissaritipparput.Tassuuna peqatigiissuarni BankNordikimi inuusuttortavut pikkorissut nunat killingi qaangerlugit eqimattakkaarlutik nutaaliornermi unammisarput. Unamminermi isumassarsiorneq allatullu eqqarsarsinnaaneq pingaartitaralugit bankip niueriaasianut siuarsaataasinnaasunik nassaarsiussapput. Ukiut tamaasa eqimattat nutaat pilersinneqartarput. Unammisitsinermi pingaarnertut siunertarineqarput bankip unammillersinnaanerata nukittorsarnissaa, nunanilu avannarlermiuunerata naqissusernissaa. Taamaasillutik inuusuttut soqutigisatik aallaavigalugit suliaqaatigalutik periutsit nutaat inerisarsinnaavaat, timitalimmillu naammassisaqarlutik.
BankNordikimi upperivarput ilisimasavut aatsaat timitalerlugit misilittagaqarfigigaangatsigit piviusunngortikkuminarnerusartut. Niuernikkut aqutsinikkullu pikkorissunik suleqatitaallattaarluta ilinniartut, praktikkertut ilinniarnerullu saniatigut sulisut ulluinnarni ingerlatsinitsinni ilaatittuarpagut. Taamaasilluta inuusuttut ilinniartullu suliffeqarfimmi pissanganartumi ilinniarfeqarnissaannut aqqutissiuuttarpagut, tamannalu aamma suliffeqarfiup iluani suleqatigiinnerup eqaannerunissaanut sunniuteqartarpoq.
Nutaanut ammaassillattaarneq
Ullutsinni aningaaserivippassuit aningaasaqarnermut ilinniartoqarneq atorunnaarlugu qaffasinnerusumik ilinniagalinnik taamaallaat atorfinitsitsisalernikuugaluartut, suli uagut aningaasaqarnermut ilinniartunut nutaanut ammaassillattaasarpugut. 2016-imi Naalagaaffeqatigiinnerup iluani aningaasaqarnermut ilinniartut 37-t aallartipput, taakkunanngalu 17-it uatsinni ilinniartunngortuupput. Aningaasaqarnermut ilinniartut suliffeqarfiup iluani eqaannerusumik sulinissamut sunniuteqartarmata ilaatittarpagut, taakkulu ilinniarnermi kingorna bankimi ingerlaqqikkajummata aamma sulisut aalajaannerunissaanut sunniuteqaqataasarput. BankNordikip ilinniartoqartarnera pillugu allaaserisaq ilaasortanut atuagassiami Kreds Øst nr. 3/2016-imiittoq uani atuaruk.
Pikkoriffiit assigiinngitsorpassuit
Bankeqarnerup ineriartortuarnera ilutigalugu sulisunut piumasaqaatit annertusiartuinnarput, qaffasissumillu ilinniagaqarnissaq pisariaqartinneqarnerugaluttuinnarluni. Taamaakkaluartorli bankimi praktikkernertalimmik ilinniartuusimasut BankNordikimi suli maannamut assut pingaartippagut, ulluinnarni bankimi suliarineqartartunik ilisimaarinnittuusarmata. Suliffeqarfitsinni atuagarsornikkut siammasissumik qaffasissumillu ilisimasaqarluartunik sulisoqarnissaq pingaaruteqarpoq, ullutsinnili aamma immikkuullarissunik assigiinngitsunik pikkoriffeqarnissaq pisariaqarnerulernikuuvoq, misilittagaqarluarnissarlu pisariaqarluni. Taamaammat BankNordikimi sulisuvut sulinermi saniatigut ilinniarusuttut tapersersortarpagut. Naatsorsuutigaarput siumut atorfeqarluarnissamut tamanna iluaqutigissagaat, aamma ilikkagaat misilittagaallu BankNordikimi iluaqutigissavagut.
Sulisut ineriartornissaat siunertaralugu oqaloqatigiinnerit ukiumoortumik ingerlanneqartarput, tassanilu inuttut ineriartorneq ilinniaqqinnerlu eqqartorneqartarput. Sulisut soqutigisatik malillugit suliffeqarfiup iluani ingerlaqqinnissaminnut periarfissinneqartarput, tamannalu aamma BankNordikip iluaqutigisarpaa.
BankNordikimi ilinniarneq
BankNordikimi ilinniartunut nutaanut ammaassillataasarpugut.
Uatsinni periarfissatit paasisaqarfiginerorusuppigit?
Uunga sianerfigitigut