Katinnissamut pilersaarusiorneq - aningaasat sipaagassallu

Kjole katissut, init katerisimaarfissat, oqaluffimmit angallanneqarneq, qaaqqusisutit il. il. Katilerussi eqqarsaatigisassat amerlaqaat – qanorli aningaasaatisi atorluarnerpaallugit kissaatisi malillugit nalliuttorsiornissamut akissaqassavisi?

Katinnissaq takorluukkat piviusunngortinniarukku siunnersuutit aajuku.

Suut pingasut pingaarnerpaatippisigit?

Aallarniutigalugu oqaloqatigiissutigisinnaavarsi ilissinnut suut pingasut pingaarnerpaajunersut. Suut aalajangersimaqqissaartumik innissaat kissaatigivisigit, suullu ilissinnut pingaaruteqarujussuanngillat? Nereqatigiinnerup sumiiffimmi aalajangersimasumiinnissaa pingaartippisiuk, imaluunniit amerlasuunik qaaqqusaqarsinnaanissarsi pingaartinneruisiuk?

Suut pingaartinnerunerlugit paasigussiuk takorluukkasi malillugit katikkussi nalliuttorsiornissassinnut piareersarneq aallartissinnaassavarsi – sapinngisamik siusissukkut aallartillusi.

Assigiinngitsuninngaanniit neqeroorfigeqqugitsi

Nerisassat, atisat allalluunniit pisiassat eqqarsaatigalugit akinik misissueqqissaarneq innersuussutigeqqunarpoq.

Assersuutigalugu arlaanni nerisassanik mamarunarluinnartunik nassaarsimagussi allanut sianerlusi nerisassanut taakkununnga assingusunik peqarnersut misissorsinnaavasi, akikinnerusoqarnersoq misissorlugu. Tassuuna imaassinnaavoq iluatsitsisusi. Kjole katissutissat nassaarigukku aamma taamatut – sumi akikinnerussanersoq misissorniariuk.

Kalaallisuut

Kalaallisuunik pissarsiorneq aningaasartornarlunilu piffissarujussuarmik atuiffiusinnaavoq – ingammik timit malillugu mersuutsinniaruit siusinaangaatsiarlutit pissarsiortariaqassaatit. Tassani amernik pissarsiorneq sapangaaqqerinerlu pisariusinnaasarput. Mersortarfimmit ammerivimmilluunniit kalaallisuunik attartorneq aamma periarfissaavoq.

Ullutsinni imaakkajuttarput katinnermi kalaallisooqariarlutik unnukkut katissummik kjoleqarlutik atisanillu qarlittalinnik atorlutik.

Kjole katissut atortussallu

Ullorsiornissamut kjole katissut atortussallu allat eqqarsaatigalugit periarfissat amerlaqaat, inummiillu inummut aningaasanik qanoq amerlatigisunik atuerusunneq assigiinneq ajorput.

Kjolemik katissummik attartorneq periarfissaavoq, ukiunilu kingulliunerusuni tamanna assut atugaalernikuuvoq. Akerlianilli kjole tammajuitsuutigalugu pigiinnarusukkukku innersuussutigisinnaavarput akikilliliinernik malinnaanissat. Katissutinik tuniniaasartut arlallit akulikitsunik akikilliliisarput, katissutit nutaat inissaqartinniarlugit.

Kjolemut atortussat assigiinngitsut aamma ilaatikkusunnartarput, tamakkulu pisiniarfimmi kjolemik pisiffimmi pisiarerusunnartarput. Kisianni tamakku nittartakkani assigiinngitsuni aamma nioqqutigineqartarput, arlalitsigullu taakkunani akikinnerujussuusarlutik, soorlu ukunani eBay, etsy.com il. il.

Qaaqqusissutit

Katikkaanni soorunami qaaqqusaqartarput, taamaammat qaaqqussutit pisariaqarput. Internetikkut atortussanik piniariarluni nammineq qaaqqussutiliorsinnaavusi, tassuunalu sipaaruteqarlusi.

Aamma qaaqqussutit qarasaasiakkut sanariarlugit e-mailikkut nassiussorsinnaavasi. Taamaasillutik qaaqqusassi qaaqqussutit ingerlaannaq tigussavaat, allakkatigullu nassiussinermi akit avaqqutissavasi.

Angerlarsimaffissinni qitinneq

Katinnermi qitinneq ileqquuvoq, ilinniaqqaanngikkaannili qitinnissaq ajornarsinnaavoq. Katinnissamut qitinnermik ilinniartinneqarnissaq aningaasartuutaaratarsinnaavoq, immaqalu koruuninik tuusintinik arlalinnik akeqarsinnaalluni.

Tassunga taarsiullugu videomik ilitsersuummik pissarseriarlusi inissinni ilinniarsinnaavusi, video taamaattoq nalinginnaasumik 200 kr-it missaanni akeqarsinnaasarpoq.

Nalunngisasi atorluarsigit

Oqaluffimminngaanniit angallatsilerussi kusanartunik biileqarnissarsi takorloorpisiuk, akissaali nangaanartillugu? Taamaappat ikinngutit ilaquttalluunniit apersorsinnaavasi, taakkua biilii kusanartut katilerussi atorsinnaassanerlugit.

Taamatuttaaq nujaleritinneq, kukileritinneq taninneqarnerlu eqqarsaatigalugit – immaqa arlaannik nalunngisaqarpusi akeqanngitsumik akikitsumilluunniit tamakkuninnga suliarinnissinnaasumik.

Katinnerup kingorna kaffillernissaq pilersaarutigigussiuk ikinngutisi ilaquttasilu aperisinnaavasi kaagiliorlutik arlaannilluunniit igallutik ikiorsinnaaneraasi. Taava aningaasanik piffissamillu sipaassaasi.

Assiliineq

Ullorsiornersi aamma assilineqartariaqassaaq, assilineqarniaraannili koruuninik tuusintilinnik arlalinnik akeqaratarsinnaavoq. Tassunga atatillugu isumassarsiatsialaavoq ikinngutit ilaquttallu apersorlugit assiliillaqqissumik nalunngisaqarnersut.

Assiliisartup assilisaasa saniatigut assinik pisinnaavusi nerrivinnut engangskameranik ilisinikkut, imaluunniit Dropboximi mappiliorlusi qaaqqusassi assinik ilioraavigisinnaasaannik.

Piukkunnartut allat

Aningaasaqarnerit malinnaavigiuk

Katisimalluni aningaasaqarneq

Ileqqaagaqarneq

Nordik360

Uatsinni periarfissatit paasisaqarfiginerorusuppigit?

Uunga sianerfigitigut

34 79 00

... allaffigalutaluunniit