Danmarkimi ilinniartut
Danmarkimut ilinniariarniarlutit aalajangersimaguit pissarsiaqarnartumik ilaatigullu unamminartussaasumik misigisaqartussanngorputit. Ikinngutitaartornerit, paasisassat nutaat, inuunermilu misilittagassat nutaat. Aammali imaassinnaavoq aatsaavissuaq nammineerlutit inuulertussanngortutit.
Nammineerneq pissanganarsinnaaqaaq, oqitsuinnaanerli ajorpoq... tassami suut tamaasa nammineq ingerlattussanngorpatit: aningaasaqarneq, ineqarneq, sillimmasiinerit ulluinnarnilu inuuneq.
BankNordikimit ulluinnarni inuuninni oqilisaavigilaarusuppatsigit, siunnersorlutit paasissutissanillu aningaasaqarnermut allanullu tunngasunik tuniorarlutit, illit nukissatit Danmarkimi ilinniarninni naapitassannut pissanganartunut atorniassagakkit. Aallartinnak ikiussavatsigit, Danmarkimiinninnilu, aammalu Kalaallit Nunaannut utissaguit ikiorumaarpatsigit.
Danmarkimut nuuleruit ilisimasassat
Nuunneq nakorsaqarnerlu
Nuunnerit Kommunimut nuuffigisannut nalunaarutigissavat. Nunamut allamut nuunnermi nuuttoq passi nassarlugu Inunnik Nalunaarsuisarfimmut orniguttussaasarpoq. Qitornaqaruit kuisinnermik atserneqarnermilluunniit uppernarsaatit nassassavatit. Nuunnerpit kingorna kingusinnerpaamik ullut 5 qaangiunneranni nuunnerit nalunaarutigisussaavat. Uani paasisaqarnerusinnaavutit: www.borger.dk.
Nuunnerit nalunaarutigigukku ilanngullugu aamma nakorsamik toqqaasinneqassaatit. Tamatuma kingorna peqqinnissaqarfimmit kortimik, det gule sundhedskort-imik, nassinneqassaatit. Korti taanna nakorsamit ikiorserneqarnissannut pisussaaffeqarninnut uppernarsaataavoq. Uani paasisaqarnerusinnaavutit: www.borger.dk.
SU
SU tassaapput ilinniagaqarnersiutit, ilinniarnerpit nalaani tapiissutit. SU-sisarniaruit aalajangersimasunik piumasaqaateqarput, taakku www.su.dk-mi takusinnaavatit, tassanilu aamma SU-sisalernissamik qinnuteqarsinnaavutit.
Akileraartarneq
Allanik isertitaqarnak SU-innarmik isertitaqaruit akileraartarnitit nammineerlutik pissusissamisut inissisimassapput, kisianni SU-sisarunnaarsimaguit imaluunniit ilinniarnerpit saniatigut suliffeqaruit siumoortumik nalunaarusianni paasissutissat aaqqissuuttariaqassavatit. Siumoortumik nalunaarusiaq aaqqissorumallugu uunga iserit: www.skat.dk. NemID atorlugu isissaatit.
Ineqarnermut tapiissutit
Ilinniartuuguit attartukkannik nammineq igaffeqarlutit ineqarlutit, piumasaqaatillu aalajangersimasut allat ilinnut atuuppata, ineqarnermut tapisisinnaavutit. Ugguuna paasisaqarnerullutillu tapiissutinik qinnuteqarsinnaavutit: www.borger.dk. MitID atorlugu iseriarlutit ilitsersuutitaa maliguk. Qinnuteqaleruit uppernarsaatit uku piareersimatikkit: inimik attartornermut uppernarsaat, akileraartarninnut ukiumoortumik naatsorsuutit, SU pillugu paasissutissat kiisalu akissarsiat allagartaat (ilinniarnerpit saniatigut suliffeqaruit).
Angalanermut tapiissutit
Ilinniarnerpit aallartinneranut atatillugu angalanissannut tapiiffigitinniaruit ilinniarfissatut qinnuteqarfigisannut saaffiginnillutit qinnuteqassaatit. Allanut angalanernut qinnuteqarniaruit ilinniarfinni ilinniarneq pillugu siunnersuisumut saaffiginnissaatit.
Kattuffik A-karsilu
Ilinniartuulluni kattuffimmi ilaasortaaneq akikittarpoq – arlalitsigullu akeqarneq ajorpoq. Ilinniakkavit kattuffimmut sorlermut attuumassuteqarnera atuarfigisanni paasiniaruk. Innersuussutigaarput kattuffigisannut ilaasortanngornissat, taamaasillutit assigiinngitsunik iluaqutsissagavit, soorlu akikitsumik sillimmasernermik, akeqanngitsumik inatsisitigut ikiorserneqarnermik, atorfittaarnermullu atatillugu qinnuteqarnissamut isumaqatigiissusiornissamullu akeqanngitsumik siunnersorneqarnermik – tamanna aamma ilinniarnerup saniatigut suliffinnut atuuttarpoq. Tamakkununnga ilanngullugu kattuffimmi pisunut sorpassuarnut akeqanngitsunik peqataasinnaasassaatit, soorlu pikkorissarnernut, oqalugiarnernut sammisaqaqatigiinnernullu allanut.
Aatsaat ilinniarnermik naammassineq sapaatip akunnerinik marlunnik sioqqullugu a-karsimut ilaasortanngornissaq piumasaqaataavoq. Ugguuna paasisaqarnerusinnaavutit: www.a-kasser.dk/dimittendreglen.
DR-imut akiliut
TV-mik internetimillu atuisinnaanermut akiliut akilerneqartartussaavoq – tamanna aamma atuuppoq mobiltelefoniinnarmik internetertaraluaruit. Akiliut ataaseq inoqutigiinnut tamanut atuuttarpoq. Akiliutip annertussusaa paasissutissallu allat ugguuna takusinnaavatit: www.dr.dk/licens.
Uatsinni periarfissatit paasisaqarfiginerorusuppigit?
Uunga sianerfigitigut