Ukiup 2020-p allanngorarfiusimaqisup kingorna aktianik niuerfimmi pissutsit

2020 pillugu eqqartuigaangatta coronap nappaalatitsinera eqqaanngitsoorneqarsinnaagunanngilaq. Aningaasaqarnermut atatillugu aamma sunniuteqanngitsoorsimanngilaq. Nappaassuup siaruaannerata kinguneranik niuerfiit assorsuaq sunnerneqarsimapput, piffinni tamangajanni niuerfiit arlaatigut unitsitaasarsimammata.

Nunat matooralermata aningaaserinerup silarsuaani niuerfiit sakkortuumik qisuariarput. Februarip martsillu ingerlanerini MSCI World-indeksi 30%-it sinnerlugit appariarpoq. Piffimmilu tassani statsobligationit erniarititaat aamma appariapiloorlutik. Aktianut tunngatillugu ukiup sisamararterutaani siullermi 2008-mi aningaaserinikkut ajutoortoqarmalli aatsaat taama ajortigisumik nalaataqarpugut. Martsip 23.-ni aktiat nalingat appasinnerpaaffimminnut killipput, aprililli ingerlanerani nunarsuaq tamakkiisumik isigalugu aktia 30%-ip missaani qaffassimalerpoq, politikkikkut ikiorsiissutit pissutaallutik.

Ukiup naalernerani amerikami qinersisoqarnerata kingorna, coronamullu akiuussutissanik kapitittoqarnissaanut nutaarsiassat tusarsaalermata, aktianik niuerfiit ingerlalluaqqilerput, taamaasillunilu 2020-p naanerani nunarsuarmi indeksi 6%-it missaanik iluanaarutitaqalersimavoq. Taamaasillunilu naak ukioq nalorninaaterujussuarnik allanngorarfissuarnillu atugaqarfiusimagaluartoq, ukiup naanerani iluanaarutigineqartoq ukiumut nalinginnaasumik aktianit agguaqatigiissillugu iluanaarutigineqartumut eqqaanarpoq.

2021 isumalluarnarpoq

2021-mi aktianik niuerfinni siuariaatit takussaalereersimapput. Nunarsuarmi indeksi 2,5%-imut qaqeriikatappoq, oqarsinnaagunarpugullu akiuussutissamik kapuisoqarnissaa niuerfinni nuannaarutigineqalereersimasoq. Taamaattorli aamma USA-mi Europamilu tunillatsissimasut amerlerujussuaqattaartut takussaapput, upernaarlu matoorinerit assigalugit sumiiffiit ilaanni matoorisoqartaleqqissimalluni.

Niuerfiit isigigaanni matoorinerit tamakku isiginngitsuusaarneqartutut misinnarsinnaapput. Coronap tuniluunneranut akiuunnerput suli ilungersuutigeqqaartussaagunarparput, tamannalu immaqa sivisusinnaavoq. Piffissaq qaninnerusoq eqqarsaatigalugu aamma aningaasaqarnikkut katerittarnikkullu allannguutit annertungaarunnanngillat. Kisianni naatsorsuutigaarput akiuussutissanik kapuinerit aningaasaqarnikkut ingerlalluarnermik kinguneqartitsiumaartut, neriuutigaarpullu tamanna 2021-mi piumaartoq. Tamanna piviusunngussappat naatsorsuutigisinnaavarput 2021-mi aktianik niuerfiit iluanaarfiuleqqikkumaartut. Tamannalu pissaaq aningaasanik atuinerup annertusineratigut suliffeqarfiillu isertitaqarnerulerneratigut.

Erniat appasinnerat suli takussaajuarsinnarpoq, tamannalu peqqutaalluni naatsorsuutigaarput aningaasaatigineqartut ernianik niuerfinnit tiguneqarlutik aktianut aningaasalersuiffinnullu allanut nalorninaatitaqarnerusunut inississorneqassasut. Tassungali atatillugu nangaassutaasinnaasut tassaapput aktiat akiisa qaffasinnerat, suliffeqarfiillu akiitsorsimanersuat, taakkulu iluanaarutissaraluanut apparsaataasinnaapput.