Ilinniartut
Ilinniarniarlutit aalajangersimaguit siunissami iluaqutigissavat.
Ilinniartuulluni inuuneq pissanganartunik unamminartunillu misigisaqarfiusarpoq, piffissarlu aningaasaqarnermuinnaq atorusukkunnanngilat - kisianni aningaasaqarnikkut ingerlanerliussaguit ulluinnarni initoorujussuullunilu assut isumaalunnarsinnaavoq. Taamaammat ilinniartunut siunnersuutinik katersisimavugut.
Ilinniartunut siunnersuutit
Ilinniagaqarsiutit
Ilinniagaqarnersiutit assigiinngillat, tassanilu apeqqutaasarpoq sumi ilinniarneq, 18-ileereersimaneq 18-illuunniit inorlugit ukioqarneq, kiisalu Kalaallit Nunaanni ilinniarnersutit imaluunniit nunani allaniinnersutit. www.sullissivik.gl-imi paasisaqarnerusinnaavutit.
Missingersuusiorit
Aningaasaqarnerup aaqqissuulluarnissaa pingaaruteqarpoq, taava qaammatip naalernerani suutaarussimasassanngilatit. Missingersuusioruit makku malinnaavigiuminarnerussapput:
- isertitatit (ilinniagaqarnersiutit/SU, akissarsiat, ineqarnermut tapiissutit il.il.)
- aalajangersimasumik aningaasartuutigisartakkatit (ass. ineqarnermut, kiassarnermut, oqarasuaammut, fitnessimut sillimmasiinernullu)
- aningaasartuutit nikerartut (atisat, nerisassat, kaffisoriartortarnerit assigisaallu)
Missingersuusiorfissaq immersugassaq atorlugu aallartissinnaavutit. Qaammammut isertitat aningaasartuutillu tamaasa immersoreerukkit qulaani talerpiatungaani takussavat aningaasartuutinut aalajangersimasunut kontomut qaammatit tamaasa qanoq amerlatigisunik nuussisassanerlutit. Taamaasillutit ukioq kaajallallugu aningaasartuutit assigiiaassapput, akiligassitserujussuarlutillu tupaallatsinneqanngitsoorlutit. Tassa illit aningaasat aqussavatit - aningaasanit aqunneqarnak.
Ilinniarnerup saniatigut sulisalerit
Ilinniarnerup saniatigut suliffeqaruit aningaasaqarnikkut iluaqutigissavat, aammattaarli CV-nni kusassaataassaaq. Siunissami sulinissannut atatillugu ilinniarnerup saniatigut suliffigisimasat iluaqutigingaatsiarsinnaavat, tassani ilikkakkatit timitalimmik atorsinnaassagakkit, ilinniakkannut atatillugu sulinermik misilittagaqarlutit, aammalu attavissannik pissarsiortorlutit. Attavissat taakku siunissami suliffissarsiuleruit iluaqutigingaatsiarsinnaassavatit.
Katersigit
Ilinniarnerup nalaani imaassinnaavoq ileqqaagaqarsinnaarpianngitsutit, kisianni annikikkaluarpata katinnerat annertusinnaavoq. Assersuutigalugu qaammammut 250 kr. ileqqaarsinnaagukkit ukiup ataatsip ingerlanerani 3000 kr.-iussapput qaavatigullu erniaqarsinnaallutik. Angalaniaruit, initaarniaruit allamilluunniit pisissamaaruit aallarniutaalluarsinnaassapput.
Ileqqaagaqarnissamut naatsorsuuterput misilillugu aningaasat katersorusutatit anguniarukkit qanoq annertutigisumik qanorlu sivisutigisumik ileqqaagaqassanerlutit misissoruk.
Nerisassat pilersaarusiukkit silatusaarlutillu niuerniartarlutit
Nammineq initaarsimaguit sapaatip akunneranut nerisassanut pisiassanullu pilersaarusiorniarna. Aamma eqqarsaatigisinnaavat igaassat akussallu pisiatit nerisassanut assigiinngitsunut atorluarsinnaanissaat. Taava pileritsariasaarlutit akisuunik pisisoornerit avaqqutissavatit, amerlasuunillu ataatsikkut pisinikkut sipaagaqangaatsiarsinnaallutit.
Vitamin-N naammattumik pisarpiuk?
Ilinniartuulluni artornarsinnaavoq... taamaattussaagami. Kisianni ilinniarnerup nalaani nuannisarluni vitamin-N*-imik naammattumik pissarsinissaq aamma pingaaruteqarpoq.
*Vitamin-N = Vitamin-Nuannisarneq
