Sullitat eqeersimaarnerat BankNordikimi ineriartuutaavoq

Ullumi BankNordikip ukiup sisamararterutaasa pingajuannit naatsorsuutini naammagisimaarutigalugit tunniuppai. Naatsorsuutini immikkut maluginiagassaapput sullitat akornanni pisoqangaatsiarnera, appartitsinernik utertitsinerit, erniallu suli appasissut. Ukiup sisamararterutaani matumani Kalaallit Nunaanni niuerfimmi pisut pingaarnersaat tassaavoq SISA-lu pensionisias-sanut aqutsineq pillugu isumaqatigiissusiornerat.

”Ukiup sisamararterutaani tamatumani sullitat eqeersimaarsimapput, ingerlatsinikkut ineriartorneq pisimavoq pingaarnertut realkreditlånit allanngortiternerisigut, sillimmasiinernit isertitat qaffariarneritigut kiisalu 9 mio. kr.-it nalinganut appartitsinernit. Ineriartorneq ajunngitsumik pisimammat qanittukkut ilimasuutigut qaffaavigaagut, maannalu naatsorsuutigaarput 2019-imi ilanngaatissat ilanngaatigereerlugit inernerat 170-210-mio. kr.-iussasoq,” Árni Ellefsen, BankNordikimi pisortaaneq oqarpoq.

Niuernikkut pissutsit ineriartornerat erniallu aningaasartuutaajuarsinnarnerat peqqutaallutik sivisujaamik banki sullitamik uninngatitaqarnerannit aningaasartuuteqartarsimavoq. Taamaammat sullitanut privatinut inuussutissarsiortunullu uninngatitanut erniarititavut Kalaallit Nunaanni, Savalimmiuni, Danmarkimilu appartissimavagut, erniat tungaasigut aningaasartuutivut oqilisaavigiumallugit.

Sullitanut akileeriaatsit nutaat
Ukiormanna BankNordikip Apple Pay akileeriaasissatut nutaatut ilisaritippaa, maannalu bankimi sullitat Google Pay, Garmin Pay kiisalu Fitbit Pay kortimut akiliummut BankNordikimeersumut tapullugit atorsinnaalerpaat. Taamatut akileeriaatsinik nutaanik ilisarititsinermut peqqutaavoq BankNordikip sullissinikkut pitsanngorsaajuarusunnera – aamma periarfissat digitaliusut tungaasigut.

Kalaallit Nunaanni soraarnermusiassanut aningaasaateqarfiit annersaannik sullissilerneq
Oktobarimi BankNordikip nalunaarutigaa SISA-p BankNordik soraarnermusianut akiliutinik ingerlatsissussatut toqqarsimagaa. BankNordik atlantikup avannaani ukiuni 100-nik sinnilinni aningaaserinikkut sulianik tamalaanik misilittagaqarpoq, aamma soraarnermusianut tunngasunik. Taamaammat SISA-mut tulluarsakkamik isumaqatigiissusiorsimavoq, soraarnermusiassanut aningaasaateqarfiup pisariaqartitaanut kissaataanut naapertuuttumik. Isumaqatigiissusiaq taanna peqqutaalluni suliffeqarfiit 200-nik sinnillit BankNordik aqqutigalugu SISA-mut akiliisalissapput.

2019-imi ukiup sisamararterutaasa pingajuanni naatsorsuutit inerneri pingaarnersiukkat

• Akileraarutit sioqqullugit inernerat tassaavoq 201 mio. kr., 2018-imi piffimmi tassani 286 mio. kr.-uvoq. Nikingassutaanut peqqutaanerpaapput 2018-imi Savalimmiuni ingerlatseqatigiiffiup qullersaqarfiata tunineranut atatillugu isertitat ataasiaannaq pisussat
• Appartitsinerit sioqqullugit ingerlatsinerup inernera 130 mio. kr.-uvoq, 2018-imi piffimmi tassani 137 mio. kr.-uvoq.
• Taarsigassarsiarititanik appartitsinernik utertitsineq 80 mio. kr.-uvoq, 2018-imilu piffimmi tassani 93 mio. kr.-ulluni.
• Ingerlatsinerup inernera 211 mio. kr.-uvoq, siornalu piffimmi tassani 230 mio. kr.-ulluni.
• Bankip taarsigassarsisitsinera 10 mia. kr.-iuvoq, taamaasillunilu 2018-imisut illuni
• Bankip uninngatitai 2018-imi ukiup sisamararterutaasa pingajuanni 13,2 mia. kr.-usimasut qaffariarsimapput, 2019-imilu ukiup sisamararterutaasa pingajuanni 13,5 mia. kr.-ulersimallutik.
• Bankip realkreditimik ingerlatsinera 2018-imi ukiup sisamararterutaasa pingajuanni 12,1 mia. kr.-iusoq qaffariarsimavoq 12,9 mia. kr.-iulerluni
• Akiliisinnaassusaa 2018-imi qaammatini siullerni pingasuni 17,6%-iusoq 2019-imi piffimmi tassani 21%-inut qaffariarsimavoq.
• Bankip naatsorsuutigaa 2019-imi appartitsinerit, nalilinnik naleqqussaanerit akileraarutillu sioqqullugit ingerlatsinerup inernera 160-200 mio. kr.-ip nalaanissasoq (2019-imi ukiup sisamararterutaani siullerni pingasuni: 130 mio. kr.).
• Oktobarip 18.-ni 2019-imi BankNordikip ilimasuutini qaffaavigai, siornatigut nalunaarutigineqarsimavoq ilanngaatissat ilanngaatigereerlugit ukiumut inernera 100-150 mio. kr.-ip nalaaniissangatinneqartoq, maannakkut naatsorsuutigineqarpoq 170-210 mio. kr.-iussasoq (2019-imi ukiup sisamararterutaani siullerni pingasuni: 158 mio. kr.).