Coronavirus: internetimi imminut illersornissaq

Coronavirus pissutaalluni tamangajatta ulluinnarni atukkavut allanngungaatsiarsimapput – ajoraluartumilli internetikkut pinerluttartut suli pinerluttarput. Oqartussaasut arlallit nalunaarsimapput uukapaatitsisartut pissutsit taamaannerat iluatigalugu innuttaasunit paasissutissanik pissarsiortorsimasut.

Periuserisaat ilaatigut ilisarnartutoqaapput. Taamaammat makku suli eqqumaffigisassavatit:

•SMS-it pisortatigoortunit aallaaveqarpasissut, linkinik toorseqqusisut imaluunniit paasissutissanik tuneqqusut.
•E-mailit NemID-mi paasissutissaatinnik kortinnilluunniit paasissutissanik qinusut.
•Telefonikkut sianerfigitillutit paasissutissanik tunniusseqquneqaruit. Sianertup normua tatiginarpasikkaluarpalluunniit uukapaatinneqarniaqinak, aamma oqaluttoq allamiorpalunnani oqalukkaluarpalluunniit.

Kortivit NemID-villu paasissutissartai isertuussassaapput allanullu tunniutinngisaannagassaallutik – bankitullu paasissutissanik taakkuninnga qaquguluunniit qinnuiginavianngilatsigit. Inuup arlaata sianerfigalutit paasissutissat uku tunniuteqqussappagit: atuisutut aqqit, isissutissat, kortip normui, NemID-p paasissutissartai il.il., taava telefoni ilissavat. Tamakkuninngalu e-mailikkut SMS-ikkulluunniit allagarsissaguit taakku ingerlaannaq peertarigit.

Iluanaarniartunit uukapaatinneqannginnissamut siunnersuutitsialaat

Uukapaatitsiniarlutik e-mailinik SMS-inilluunniit nassiussisoqartillugu siunnersuutit Digitaliseringsstyrelsenimeersut aajuku: 

1. E-mailini SMS-inilu linkit (innersuussutit) toornaveersaartakkit
   Uukapaatitsisartut e-mailinik SMS-inillu tatiginarpasissunik ilusilersuillaqqissuupput. Nalorniguit suliffeqarfiup nassiussisuunerartup pisortatigoortumik nittartagaa alakkarniariuk. Nassiussisup uukapaatitsisuunissaa nalornissutigigukku internetikkut misissuipallallutit e-mail-adresserineqartoq telefonnormuluunniit atorneqartoq suliffeqarfimmut tassunga ilumut atanersoq misissorsinnaavat. Imaluunniit suliffeqarfiup pisortaqarfiulluunniit nittartagaa aqqutigalugu telefonnormualluunniit pissarsiareriarlugu ilumut saaffiginnittuunersut paasiniarsinnaavat.
2. Toorsitinnak anersaartorluaqqaarit
   Uukapaatitsisartut arlaannik iliuuseqapallatsikkusussavaatsit. Akitinnak toorsitinnalluunniit utaqqeqqaarit, piffissaqarluarlutit eqqarsaatigilluaqqaarlugu qisuariarit.
3. Uukapaatitsiniartunit linkit ilisarnaataat mikisuaqqat eqqumaffigikkit
   Uukapaatitsisartut e-mailinik SMS-inillu tatiginarpasissunik ilusilersuillaqqissupilussuupput, linkinillu toorsititsiniaasarlutik. Kisianni ilumoortuusaarnerannut assigiinngitsunik takussutissaqarsinnaasarpoq: e-mailisisimaguit linkitalimmik linki mus-innik toornagu tikkuaannarukku, taava linki ilumut sumut ingerlatitsisuunersoq nuissaaq. Linki taanna toornagu, nassiussisup pisortatigoortumik nittartagaanut iseruit, taava nittartakkami ilitsersuutit malillugit e-mailikkut orneqquneqartoq nuisissinnaavat.

Aamma app-i ”Mit digitale selvforsvar”, imminut illersornissamut app-i, uani aasinnaavat. Uukapaatitsinerit takussaanerusut pillugit mianersoqqusillattaasarpoq, salloqittaammillu allagarsisimagaanni qanoq iliornissamik siunnersuisarluni.

Ajutoorsimaguit
Akiliinermut kortivit NemID-villuunniit paasissutissartaasa arlaannit pissarsiarineqarsimanissaat pasitsaakkukku, taava ingerlaannaq NemID-t imaluunniit kortit matutissavat.

NemID-p matutinnissaanut ilitsersuut aana.

Nammineerlutit akiliinermut kortit matusinnaavat Netbank Mobilbankiluunniit aqqutigalugu. Aamma telefon 34 79 00-imut sianerlutit korti matutissinnaavat.

Bankip ammasarfiisa avataanni Nets-imut sianersinnaavutit:

Hævekortimik, Dankortimik kiisalu Visa/Dankortimik matutitsineq: +45 44 89 29 29
Mastercardimik aamma Mastercard Debitimik matutitsineq: + 45 44 89 27 50

Nets-imut sianeruit paasissutissat uku apeqqutigineqassapput: ateq, najugaq, aningaaserivik, kiisalu kortip normua, kontonormu imaluunniit inuup normua, tamatumuunalu paasissutissanik tunniussinissaq ajunngilaq. Taakku apeqqutigineqartarput kortip eqqortup matuneqarnissaa qulakkeerumallugu. Korti matuneqarpat atorsinnaajunnaassaaq.

Allaffik angerlarsimaffimmut nuunneqaraangat

Ulluni makkunani angerlarsimaffimmit sulisuusugut arlaqarpugut. Taamaammat suliffimmi ittorput ningiorpulluunniit ullormut attaviginnginnerusarparput, taamaammallu periuseq CEO-fraud aamma periarfissaalluni. CEO-fraud uukapaatitseriaasiuvoq, tassani pinerluttuliortut suliffeqarfimmi pisortaasaarlutik aqutsisuusaarlutilluunniit kontomut ilisarnanngitsumut aningaasanik nuusseqqusisarput.

Angerlarsimaffimmi sulinermut atatillugu siunnersuutitsialaat Center for Cybersikkerhedip nittartagaani saqqummersinneqartartut malinnaavigisinnaavatit.