BankNordikip Kalaallit Nunaanni taarsigassarsisitsinera 33%-inik qaffariarsimavoq

BankNordikip ukiormanna qaammatini siullerni qulingiluani naatsorsuutaasa inernerisa takutippaat banki sullitaalu COVID-19-ip ilungersortitsineranik qaangiilluarsimasut. Bankimi ineriartorneq ingerlalluarmat maanna avatangiisinut tunngasumik illumut taarsigassarsinermi erniat appartinneqalerput.

Naak ukioq 2020 ulloq manna tikillugu immikkuullarillunilu imaannaanngissimagaluaqisoq BankNordikip naatsorsuutai ingerlalluarnermik takutitsipput. Bankip Kalaallit Nunaata niuerfiani inissisimanini aalajaallisartuarpaa, taarsigassarsisitsine-ra 33%-imik qaffariarsimavoq realkrediteqartitsineralu 2019-imi piffimmut tassunga naleqqiullugu 18%-imik qaffariarsimalluni.

Ulloq manna tikillugu COVID-19 pissutigalugu taarsigassarsiaminnik akilersuinissamut kinguartitsisariaqarsimasut ikittunnguusimapput, taamaattorli aningaasaqarnikkut ilungersunartorsiortoqalissagaluarpat suli maannamut banki ikiuinissaminut piareersimavoq.

”Ilungersunartorsiorfiup nalaani sullitavut qanimut attaveqarfigisarsimavagut, nuannaarutigaarpullu amerlanerpaartai qaangiilluarsimammata. COVID-19-imut atatillugu pissutsit tamarmik suli nalorninaatitaqarput, taamaammallu ilungersunartorsiorfiup kingunerisaanik annaasaqassagaluarutta aningaasat sillimmatissatut immikkoortissimasavut amerlisimavagut,” Árni Ellefsen, BankNordikip pisortaanera oqarpoq.

Nunarsuaq tamakkerlugu nappaalaneq BankNordikip aningaaserinikkut angusaanut sunniuteqangaarsimanngilaq, bankip ukiumut angusassatut naatsorsuutigisai maanna bankip siulersuisuisa ukiup aallartinnerani ilimagisimasaanit annertunerulersimapput. Taamaakkaluartorli coronap tuniluunnerata kinguneri suli nalorninaateqaqimmata bankip annaasaqassagaluaruni aningaasat matussusiisussatut sillimmatissatut immikkoortinneqarsimasut amerlisimavaat. Aningaasat sillimmatissat maanna katillugit 50 mio. kr.-upput, taakkunannga 14 mio. kr.-t Kalaallit Nunaanni bankip naatsorsuutaanut attuumassuteqarput.

Bankip aningaasartuutit isertitallu maanna nalimmassarnerusinnaasimavai, tassunga pingaarnertut pissutaapput pilersaarutinik allannguinerit 2019-imi pisimasut, kiisalu ingerlatsinerup pisariitsuutinnissaanut suliniuteqartuarneq. Akiliisinnaassusaa maanna 24,9%-iummat nappaalanersuaq kingunipiloqassagaluarpat banki isumalluutissaqarluarpoq.

Avatangiisinut tunngasumik illumut taarsigassarsiat akikinnerusut

BankNordik inuiaqatigiinni piujuartitsinermut siuarsaaqataarusuppoq, tassungalu atatillugu avatangiisinut tunngasunik illumut biilinullu erniakitsunik taarsigassarsiassaqartitsisarluni. Bankip aalajangiussimavaa maanna avatangiisinut tunngasumik illumut taarsigassarsiassat erniaat 2,9%-imit 1,9%-imut appartinniarlugit, taamaasillutik illuutillit akikinnerusumik pisariinnerusumillu avatangiisinut iluaqutaasussanik nukissamillu sipaaruteqartitsisussanik illortik iluarsarsinnaalerpaat. Taarsigassarsinerit taakku assersuutigalugu igalaanik taarsiinissamut imlt. innaallagissiorfinnik seqernup qinngornerinik tigooraassutinik pisinissamut atorneqarsinnaapput.

BankNordik Nuummi immikkoortortaqarfeqarpoq, Telepostilu suleqatigalugu sine-rissami aamma sullissisuulluni, taamaasillunilu Kalaallit Nunaata annertunersaani sullitaminut ornikkuminarluni.

2020-mi ukiup sisamararterutaasa pingajuanni naatsorsuutit inerneri pingaar-nersiukkat

• Akileraarutit sioqqullugit inernerat tassaavoq 156 mio. kr., 2019-imi piffimmi tassani 201 mio. kr.-uvoq
• Appartitsinerit sioqqullugit ingerlatsinerup inernera 155 mio. kr.-uvoq, 2019-imi piffimmi tassani 108 mio. kr.-uvoq
• Taarsigassarsiarititanik appartitsinernik utertitsineq ilanngaatissat ilanngaatigereerlugit 6 mio. kr.-uvoq, 2019-imilu piffimmi tassani 80 mio. kr.-ulluni
• Ingerlatsinerup inernera 162 mio. kr.-uvoq, 2019-imilu piffimmi tassani 189 mio. kr.-ulluni
• Bankip taarsigassarsisitsinera 9,8 mia. kr.-uvoq, 2019-imilu piffimmi tassa-ni 10 mia. kr.-ulluni
• Bankip uninngatitai 2019-imi piffimmi tassani 13,6 mia. kr.-usimasut appariarsimapput, 2020-milu piffimmi tassani 12,9 mia. kr.-ulersimallutik
• Akiliisinnaassusaa 2019-imi piffimmi tassani 21%-iusoq 2020-mi 24,9%-inut qaffariarsimavoq
• Siulersuisut naatsorsuutigaat ilanngaatissat ilanngaatigereerlugit naatsorssuutit inernerat katillugit 140 - 160 mio. kr.-ip nalaaniissasoq (ukiup aallarti-nnerani 100 – 150 mio. kr.-ip nalaaniinnissaa naatsorsuutigineqaraluarpoq).

Paasissutissat sukumiinerusut

Árni Ellefsen, pisortaaneq, tlf: +298 230 348