BankNordik atertaarpoq
Ingerlatseqatigiiffik BankNordik ullumi atertaarpoq, aterilerpaalu Føroya Banki (Savalimmiut Bankiat). Taamaattorli ingerlatseqatigiiffiup suliffeqarfiutaasa Kalaallit Nunaannilu immikkoortortaqarfiup atitoqqatik ateriinnassavaat. Taamaasilluni atertaarnerput Kalaallit Nunaanni sullitatsinnut malunniuteqassanngilaq. Nuummi immikkoortortaqarfipput BankNordikimik ateqaannassaaq, ukiormanna kingusinnerusukkut allamik atertaarnissaata tungaanut.
BankNordik – taamani aterisimasani Føroya Banki ateralugu – 1906-imi tunngavilerneqarpoq. Danmarkimi Kalaallit Nunaannilu immikkoortortaqarfinnik pisiortoreernerup kingorna bankimi 2010-mi aalajangiunneqarpoq BankNordik-imik ateqalissasoq, nunani taakkunani pingasuni ateq taanna piukkunnarnerusorineqarmat. 2021-mi Danmarkimi immikkoortortaqarfik tunineqarpoq, kingornalu bankimi aalajangiunneqarsimavoq Savalimmiuni Kalaallit Nunaannilu ingerlatsineq ukkatarineqassasoq.
”Siulersuisuni aqutsisunilu isumaqatigiissutigaarput atitoqannguarput Føroya Banki atuleqqikkusullugu, aterlu taanna Savalimmiormiut ilaasa uatsinnut suli taaguutigisarpaat. Føroya Banki Savalimmiuni suliatsinnut tunngatillugu eqquilluarnerullunilu kinaassuseqarnerusutut oqaatigineqarsinnaavoq, taamatuttaarlu Kalaallit Nunaanni aamma suliatsinnut atatillugu atermik tulluarnerusumik ”kinaassuseqarnerusumillu” nassaarniarpugut. Ukiup matuma ingerlanerani Kalaallit Nunaanni atermik ujartuilluta pissanganartumik unammisitsiumaarpugut, unammisitsinermilu kikkulluunniit peqataasinnaassapput,” Turið F. Arge, pisortaaneq, oqarpoq.
Illit ikiorsinnaavatsigut
Maajimi bankip atissaanik ujartuilluta pissanganartumik unammisitsissaagut, Kalaallit Nunaanniittullu kikkulluunniit BankNordikip atissaanik siunnersuuteqarlutik peqataasinnaassapput. Kikkulluunniit unamminermi peqataasinnaassapput: inuusuttut, utoqqaat, sullitavut sullitarinngisavullu, sinerissami sumiluunniit najugaqaraluaruit peqataanissannut tikilluaqqusaassaatit. Unammisitsineq pillugu kingusinnerusukkut paasissutissiinerujumaarpugut.
”Kalaallit Nunaanni ingerlatsinerput tulluusimaarutigaarput – ukiut tamaasa sullitanit nutaanit ornigarneqartarpugut, pikkorissorsuarnillu misilittagartuunik sulisoqarluta, ilarpassuilu 2010-mi aallartikkattali bankimi sulisoraavut. Ateq BankNordik ajunngilaq ukiorpassuarnilu atugarisimavarput, taamaattorli kissaatigingaaraluarparput atermik immikkut illuinnartumik, Kalaallit Nunaanni immikkoortortaqarfitsinnut, sulisutsinnut, sullitatsinnullu tulluaqqissaartumik nassaarusulluta,” Turið F. Arge, pisortaaneq, oqarpoq.
Pisortatigoortumik allannguineq
Ingerlatseqatigiiffiup aqqa allanngorluni Føroya Banki atulissaaq, suliffeqarfiilli ingerlatseqatigiiffiup ataaniittut Trygd, Skyn aamma NordikLív taamatut ateqaannassapput, Kalaallit Nunaannilu immikkoortortaqarfipput ukiormanna atertaarnissaata tungaannut BankNordikimik ateqaannassalluni.
Allannguummut massakkut pisumut apeqqutissaqassaguit, allarluinnarmilluunniit apeqqutissaqaruit attaviginissatsinnut tikilluaqqusaajuaannarputit.