Ukiup sisamararterutaani siullermi inernerit naammaginartut

BankNordikip ukiormanna qaammatini siullerni pingasuni naatsorsuutit ullumi saqqummersippai, ataatsimullu isigalugit inernernik naammaginartunik takutitsipput, appartitsinerilli annertuseriarsimapput.

Akileraarutit sioqqullugit inernerat 70 mio. kr.-iuvoq, siornalu piffimmut tassunga naleqqiullugu allanngungaarsimanani. Erniaqarnikkut pissutsit iluarinarput, bankillu nammineq aningaasaatai erniorluarsimallutik, tamakkuali saniatigut inernerit kusanartut isertitat aningaasartuutillu nalimmassarluarneqarsimanerannik peqquteqarput. Sullitatta eqeersimaarnerat peqqutaalluni uninngatitat taarsigassarsititsinerillu aqqutigalugit isertitat qaffalaarsimapput, aningaasartuutillu ukiup sisamarerterutaanut siuliinut naleqqiullugit allanngungaarsimanatik.

Naak piffimmi matumani pissutsit ingerlalluaraluartut appartitsinerit siornatigornit annertunerulersimapput. Appartitsinerit annertusinerat naatsorsuutigineqareersimavoq, tamatumunnga ilaatigut peqqutaavoq sullitat inuussutissarsiortut ataasiakkaat ajornartorsiornerat, appartitsinerit pillugit malittarisassat malillugit annaasaqarsinnaanerinik ilimasuutit appartitsinernut ilannguttussaagatsigit.

”Appartitsinerit annertuseriarnerat sullitatta ataatsimut isigalugit akiliisinnaassusaannik ersersitsinngilaq, sullitavut ataatsimut isigalugit akiliisinnaassuseqarluarput. Kalaallit Nunaanni niuernerput qiviassagutsigu uninngatitat taarsigassarsiallu siornamut naleqqiullugit qaffariarsimapput. Aammattaaq sullitanit nutaanit ornigarneqarsimavugut, tamannalu soorunami naammagisimaarutigaarput, Kalaallit Nunaannilu suli siumukarsinnaanissarput naatsorsuutigalugu,” Turið F. Arge, pisortaaneq, oqarpoq.

Ukiormanna atertaassamaarpugut

Siornatigut nalunaarutigeriikkatsitut ukiormanna bankip atertaarnissaanut atatillugu unammisitsissamaarpugut. Savalimmiuni immikkoortortaqarfipput martsip qaammataani Føroya Bankimik ateqaleqqippoq (Savalimmiut Bankiat), 1906-imi banki tunngavilerneqarmat aterisani aterileqqillugu. Ateq Føroya Banki atermit BankNordikimit kinaassuseqarpalunneruvoq, taamatuttaarlu Kalaallit Nunaanni immikkoortortaqarfipput piukkunnarnerusumik atertaartikkusupparput Kalaallit Nunaanni suliatsinnut tulluaqqissaartumik.

”Kalaallit Nunaanni immikkoortortaqarfipput tulluusimaarutigaarput – sullitanit nutaanit ornigarneqartuarpugut, aammalu pikkorissunik misilittagartuunillu sulisoqarluta, ilarpassui banki 2010-mi aallartimmalli tamaani sulisimasunik. Ateq BankNordik ajunngikkaluarpoq, kisianni kissaatigaarput atermik tulluarnerusumik nassaassalluta, Kalaallit Nunaanni sullitatsinnut sulisutsinnullu pikkorissunut tulluunnerusumik. Taamaammat ukiormanna atissarsiorluta unammisitsinissarput qilanaaraarput, taamanikkussamut Kalaallit Nunaanniittut kikkulluunniit atissatsinnik siunnersuuteqarlutik peqataasinnaassapput,” Turið F. Arge, pisortaaneq, oqarpoq.

Naatsorsuutit inerneri pingaarnersiukkat

  • Akileraarutit sioqqullugit inernerat tassaavoq 70 mio. kr.

  • Appartitsinerit sioqqullugit ingerlatsinerup inernera 70 mio. kr.-iuvoq

  • Taarsigassarsiarititanik appartitsinernik utertitsineq 23 mio. kr.-iuvoq

  • Bankip taarsigassarsisitsinera 8,9 mia. kr.-iuvoq

  • Bankip realkreditimik taarsigassarsisitsinera 2,6 mia. kr.-iuvoq

  • Bankip uninngatitai 8,9 mia. kr.-iupput

  • Tunngaviusumik akiliisinnaassusaa, NEP-kapital ilanngullugu 39,9%-iuvoq

  • Siulersuisut naatsorsuutigaat ilanngaatissat ilanngaatigereerlugit 2024-mi naatsorsuutit inernerat katillugit 225 – 255 mio. kr.-ip nalaaniissasoq

Paasissutissat sukumiinerusut
Turið F. Arge, pisortaaneq, tlf: +298 230 678