Aningaasaqarnermut ilinniarneq pillugu

Ilinniartunngorniaraanni piumasaqaatit

BankNordikimi aningaasaqarnermut tunngasunik ilinniartunngorniaruit TNI Administration, HHX, NI1, assigisaanilluunniit ilinniagaqarsimassaatit, karakteeritigut angusarissaarsimassaatit, matematik/naatsorsuutit ilisimasaqarfigilluarlugit. Taamaakkaluartorli karakteeriginnissat kisimi apeqqutaanngilaq.

Pingaaruteqarpoq namminersorlutit sullissilluarsinnaanissat, anguniagaqartuullutit, akuullutit, ammasuullutillu. BankNordikimi aamma piumassuseqarluarneq, soqutiginninneq, angusaqarusussuserlu pingaartippagut.

Suleqatigiiaarneq atortupilussuuarput, bankimilu oqaloqatiginninneq siunnersuinerlu ulluinnarni suliassavit annertunersarissavaat. Aamma piffinni ulapaarfiusuni uisakajaarnak sulilluarsinnaanissat pingaaruteqarpoq.

Atuagarsornertaa

Ilinniarnerpit atuagarsornertaa aningaaserinermut tunngatillugu ilisimasassanik assigiinngitsorpassuarnik imaqassaaq. Pikkorissarnerit assigiinngitsut peqataaffigineritigut ilisimasatit misilittakkatillu amerliartussapput. BankNordikimi pingaartitat, anguniakkat periutsillu aallaavigalugit ilikkakkatit timitalersinnaalerumaarpatit.

Atuaraangavit ilinniartoqatitit - ilaat bankinit allaneersut - eqqartueqatigalugillu misilittakkanik avitseqatigisinnaasarumaarpatit. Taamaasillutik suliat aqqutigalugit attavissatit amerlisassavatit.

Suliffimmi sungiusarnertaa

Ulluinnarni sulininni ilinniakkatit timitalerlugit misilittagaqarfissavatit. BankNordikimi suliavut amerlaqaat, ullormiillu ullormut assigiinngeqalutik. Aningaaserivik ingerlalluassappat sullitassaqartariaqarpugut, taamaammallu suleqatitit peqatigalugit sullissilluarnissarsi pingaaruteqartuaannarpoq.

Ilinniartunngoruit sivitsunngitsoq sullissisalissaatit akisussaaffilerneqarlutillu. Sullitat assigiinngitsorpassuartigut siunnersugassaasarput. Assersuutigalugu biilitaarniarunik illuutitaarniarunilluunniit. Aningaasaqarnikkut missingersuusiorneq, taarsigassarsianullu tunngasut aamma suliassaasinnaasarput. Aamma ilaatigut Sullitat angalaniarunik atuaqatigiillutilluunniit paasisassarsiorniarunik allamiut aningaasaataat allallu pillugit siunnersugassaasinnaasarput.

Naatsumik oqaatigalugu: Ullut tamaasa nutaanik ilikkagaqartarumaarputit - aningaaserinikkut inuttullu. Ilisimasatigut misilittakkatigullu ineriartortuassaatit, suleqativillu tapersersussavaatsit.

Inuttut ineriartorneq aamma ilaavoq

Aningaaserinermut ilinniartunngoruit sammisassat siulliit inuttut piginnaasanut tunngasuupput. Sammisassat ilagaat attaveqaqatigiinneq, sullissineq, suleqatigiinnerlu. Ilinniagassat taakku tuaviinnaq ilikkagassaanngillat, ilinniarnerullu ingerlanerani ilaajuassallutik. Aamma ukiut marluk ilinniartooreerlutit naammassereeruit suli ilinniagassaajuassapput.

Paasissutissat allat

Aningaaserinermut tunngasunik ilinniarneq Finanssektorens Uddannelsescenterip (FU) Nuummilu Niuernermik Ilinniarfiup suleqatigiinnerisigut aaqqissuussaavoq. FU-p nittartagaani Nuummilu Niuernermik Ilinniarfiup nittartagaani paasisaqarfiginerusinnaavat. 

Isiginnaagassiami uani aamma paasisaqarfiginerusinnaavat.