BankNordikKalaallit Nunaanni ukiup affaani qaangiuttumi  ingerlalluarsimavoq

Ullumi BankNordikip 2023-mi ukiup affaani siullermi naatsorsuutit inerneri saqqummiuppai, ataatsimullu isigalugit naatsorsuutit inerneri ajunngeqaat.

Ukiormanna qaammatini siullerni arfinilinni BankNordikip Kalaallit Nunaanni naatsorsuutaasa inerneri akileraarutit sioqqullugit 19 mio. kr.-upput. Sullitanit nutaanit ornigarneqarneq aningaaserinikkullu eqeersimaarneruneq peqqutaallutik siorna piffissamut tassunga naleqqiullugu taarsigassarsiarititat 23%-inik qaffariarsimapput. Taamaammat Kalaallit Nunaanni suli siuariartoqqinnissaq bankimit ilimasuutigineqarpoq.

”Ukiormanna qaammatini siullerni arfinilinni akileraarutit sioqqullugit naatsorsuutit katillugit inernerat 162 mio. kr.-iupput, tamannalu assut naammagisimaarutigaarput. Aammattaaq nuannaarutigaarput ataatsimut isigalugu sullitavut aningaasaqarnermikkut ingerlatsilluartuummata,” Turið F. Arge, pisortaaneq, oqarpoq.

Ernialimmik ileqqaagaqarluni katersisoqarsinnaalerpoq

Ukioq 2022 assigalugu 2023-mi erniat qaffakkiartuinnarnerat assut malunnarpoq, tassuuna aningaasanik taarsigassarsiniarneq akitsoraluttuinnarmat. Akerlianik erniat qaffariarnerat peqqutaalluni uninngasuuteqarnermi erniat aamma qaffannikuupput, taamaasillunilu erniaqartitsisumik ileqqaagaqartoqarsinnaalersimalluni. Bankimi kontot assigiinngitsut sullitamut immikkut tulluarsakkat periarfissaapput, soorlu kontot piffissami sivikitsumi sivisunerusumiluunniit pituttorsimatitsisut iluatinnartunik erniaqartitsisut, taamaasillunilu aningaasanik uninngatitaqarneq aamma iluatinnarsinnaalersimalluni.

Ukiup sinneranut ilimasaarutit

Qaammatini tulliuttuni ilimasaarutit ajorpasinngillat. ”Erniat qaffakkiartoraluartut aningaasaqarnikkut ingerlanerliulernissat ukiup aallartinnerani ilimasaarutigineqartut suli misigilinngilagut. Taamaattorli pissutsit sumut ingerlassanersut suli nalunartortaqarput, nalunngilarpullu sorpassuit illuanut saassinnaasut. Taamaattumik sullitavut siunnersoraangatsigit sukumiisumik siunnersuisarpugut massakkut atugaat siumullu ilimasaarutit aallaavigalugit,” Turið F. Arge, pisortaaneq, oqarpoq.

Ukiup affaani siullermi naatsorsuutit inerneri pingaarnersiukkat

• Akileraarutit sioqqullugit inernerat 162 mio. kr.-iuvoq

• Appartitsinerit sioqqullugit ingerlatsinerup inernera 119 mio. kr.-iuvoq

• Taarsigassarsiarititanik appartitsinernik utertitsineq 16 mio. kr.-iuvoq

• Ingerlatsinerup inernera 135 mio. kr.-iuvoq

• Bankip taarsigassarsisitsinera 8,7 mia. kr.-iuvoq

• Bankip realkreditimik taarsigassarsisitsinera 2,6 mia. kr.-iuvoq

• Bankip uninngatitai 8,4 mia. kr.-iupput

• Akiliisinnaassusaa, NEP-kapital ilanngullugu 30,4%-iuvoq

• Siulersuisut naatsorsuutigaat ilanngaatissat ilanngaatigereerlugit 2023-mi inernerat 235-265 mio. kr.-ip nalaaniissasoq.

Paasissutissat sukumiinerusut

Turið F. Arge, pisortaaneq, tlf: +298 230 678