Pigisat agguarnerat, meeqqat, aapparmullu akilersuutit

Pigisat agguarnerat

Angerlarsimaffimmi pigisat marlunnut agguarneqartussanngoraangata katissimaneq katissimannginnerluunniit apeqqutaallutik pissutsit assigiinneq ajorput. Ataani nassuiarneqarput.

Katissimanatik inooqatigiittut

Katissimanasi najorsimallusi qimakkussi pigisasi aappariinnermut nassarsimasasi avissaarussi tigussavasi. Najulernersi sioqqullugu najornissinniluunniit akiitsorsimagussi aamma tamakku nammineq akiligassarissavasi, tassa imaappoq akiitsorneq ilissi atissinnik atsiorneqarsimappat taanna akiligassarissavarsi.

Tamanna ilungersunartortaqarsinnaavoq! Assersuutigalugu biilit nalunaarsorneqarneranni aappaata atia allassimappat, biilinulli taarsigassarsiat marluullusi atsiugarigussiuk akisussaaffigalugulu. Taava ima paasisassaassaaq aappaata biilit tigummisussaallugit pisussaatitaaffigigaa, aappaatali biilinut pisussaatitaaffeqanngikkaluarluni akiitsuisa affai akiligassaralugit.

Isumaqatigiissinnaanngikkussi

Ukiorpassuarni inooqatigiissimagussi - ilimanarluinnarpoq - aningaasaqarnersi ataqatigiittupilussuusimassasoq. Katissimanngikkaanni pigisat agguarneqarnissaannut inatsisitigut aalajangersakkat allaasarmata soorlu assersuutigalugu ataaseq tamanut akileeqataasaraluarluni ass. biilinik inigisamilluunniit piginnittutut nalunaarsorsimanngippat, ajornartorsiutinik pilersitsisinnaavoq.

Ilaanneeriarlutik katissimanatik inooqatigiittut eqqartuussivikkut pigisaminnik avitsinissamut ikiorneqarsinnaasarput.

Pigisassi agguarnissaannut isumaqatigiinneq ajulissagussi innersuussutigaarput advokat attavigalugu pisinnaatitaaffisi periarfissasilu pillugit paasiniaanissarsi.

Katissimasut

Katissimagussi tunngaviusumik pigisanik piginneqatigiinneq atugarissavarsi. Tassa imaappoq averusernermi/avinnermi aappariinnissinnut nassarsimasasi tamaasa avissavasi. Taamaattorli pigisassi ilaat immikkut pigisatut isumaqatigiissusiornikkut aalajangiussimagussigit taakku nammineq pigissavasi.

Pigisat agguarneqarneranni tamassi immikkut pigisasi naatsorsussavasi. Tassa imaappoq qanoq pigisaqartiginerlusi akiitsorsimagussilu qanoq akiitsoqartiginerlusi naatsorsussavarsi. Tamatuma kingorna angerlarsimaffimmi pigisat ima avinneqassapput:

• Tamassi immikkut pigisasi akiitsukkassinnit amerlaneruppata (positiv bodel), taava tamassi angeqqatigiimmik pillusi pigisasi avissavasi.
• Ataatsip akiitsui pigisaaniit annertuneruppata (negativ bodel), taava aapparisap pigisaqarnerusup pigisai kisimik avinneqassapput. Pigisat avinneqassapput tamassi assigiimmik pitillusi.
• Tamarmik akiitsui pigisaanit annertuneruppata pigisanik avitsineq pissanngilaq. Tamarmik immikkut pigisatik tigummiinnassavaat, tamarmillu nammineq akiitsukkatik akilersussallugit.

Meeraqarussi

Meeraqarussi meeqqat sumi najugaqarnissaat qanorlu sivisutigisumik anaanami ataatamilu najugaqartarnissaat aalajangissavarsi, tassungalu ilanngullugu meeqqanut akilersuuteqartassanerlusi aalajangissallugu.

Aamma eqqarsaatigisariaqarparsi paaqqinnittarfinnut, sunngiffimmi susassanut, mobiltelefoninut atisanullu tunngatillugu qanoq piniarnerlusi. Meqqanut ileqqaakkat pillugit siunissamilu pisussanut annertuunut tunngatillugu aamma oqaloqatigiilaarisi, soorlu apersortinnissaannut, nunanut allanut angalanissanut kørekortimullu.

• sullissivik.gl-imi meeqqanut akilersuutit pillugit paasisaqarnerusinnaavusi

Aapparmut akilersuutit

Averusernermi avinnermilu angutit arnallu aapparmut akilersuutinik qinnuteqarsinnaatitaapput.

Aapparmut akilersuisoqartassanersoq Rigsombudimi eqqartuussivimmiluunniit aalajangerneqartarpoq. Akiliutigineqartartussat annertussusissaat Ankestyrelsens Familieretsafdelingimi malittarisassat malillugit aalajangiunneqartarpoq, ilaatigullu isertitasi meeqqanullu akilersuutigisartakkasi isiginiarneqartassallutik.

• sullissivik.gl-imi sukumiinerusumik paasisaqarsinnaavusi

Paasissutissat allat

• Averuserneq avinnerlu pillugit sullissivik.gl-imi paasisaqarnerusinnaavutit