1. Qinnuteqaat allakkakku suna pingaartippara?
Legatinnakkumallunga qinnuteqarama Canadami praktikkerfissannit akuerisaaqqammerpunga. Universitetimi ilinniarninni taamatut periarfissaqarnissara kissaatigiuarsimavara, kisianni taamaalinerani praktikkerninni aningaasartuutissarpassuakka eqqarsaatigalugit uisakajaaqqajaalereersimavunga. Anaanaga kisimiilluni pilersuisuummat aningaasartuutissakka taarsigassarsinikkut taamaallaat akilersorsinnaavakka. Tassa imaappoq legatinnakkumallunga qinnuteqarninni kissaatigiuarsimasara pineqarpoq, aningaasat atornissaat aalajangersimasumik siunertaqarpoq, piffimmilu tassani nukinginnartumik aningaasanik pisariaqartitsillunga.

2. Legatinnannera uannut qanoq kinguneqarpa?
Canadami praktikkersinnaanera assut iluatinnarsimavoq, taamaammallu legatinnakkama aningaasatigut aporfeqarnanga praktikkernera ingerlassinnaasimavara. Taamatut ilinniarnermut atatillugu nunami allamiinneq akikitsuinnaannginnami. Ilaatigut Sverigemukarlunga biometrimik nalunaarsortittussaagama, kiisalu Canadamukarniaraanni visum akisungaatsiarluni. Ataatsimut isigalugu Canadamukarniarlunga suliaq sivisoqaaq, naatsorsuutigisimanngisannillu aningaasartuutitaqariasaaqattartarluni.

Aamma Ottawamiilerluni taama ungasitsigisumut pilluni allarluinnarnik ulluinnarni atugaqalerneq imaannaanngeqaaq – avatangiisit nutaat, sivisuumik sulereerluni kingusissukkut soraartarneq, eqqaamasassarpassuillu. Taamaammat aningaasat isumalluutiginagit inuusinnaaneq oqilisaataasimaqaaq. Legatinnassimanera assorsuaq qujamasuutigaara.

3. Massakkut qinnuteqarniartut qanoq siunnersorsinnaavigit?
Assigiinngitsunik peqquteqarluni legatinnanniartoqarsinnaavoq, kisianni isumaqarpunga qinnuteqarniaraanni legatinnattuugaanni qanoq iluaqutigisinnaanerlugu qanorlu oqilisaatigisinnaanerlugu eqqarsaatersuutigineqarsinnaasoq. Legatinnanneq qanoq kinguneqarsinnaanersoq tamatta nalugunnanngilarput, taamaakkaluartorli itinerusumik eqqarsaatersuutigilaarnissaa innersuussutigaara.

Aappaattut siunnersuutigaara nammineq kinaassutsit qinnuteqaatinni ilanngutilaaraluarukku ajunngitsoq. Qinnuteqaasiornermi taamatut isumaqartuaannarpunga. Soorunami oqaatsit ataqqinnittut qinnuteqaammullu tulluartut atorneqartussaapput, kisianni pingaaruteqarsoraara illit inuttut kinaassutsit BankNordikimi arlaatigut malugisinnaasariaqaraat. Soorlu legatinnakkaluaruit qanoq takorluukkannik piviusunngortitsisinnaanerlutit. Isumaqarpunga taamaalioruit qinnuteqartorpassuit akornanni malugineqarnerussasutit.

Kingullertut piviusunngortikkuminartumik siunnersuuteqassaanga: qinnuteqaat allareerukku ikinngutinnut atuartikkiuk isummersoqqullugulu – nalunngilluakkannut takutikkukku pitsaanerussaaq. Ikinngutit aamma inuttut kinaassutsit pillugu oqaaseqarsinnaassaaq.

Uatsinni periarfissatit paasisaqarfiginerorusuppigit?

Uunga sianerfigitigut

34 79 00

... allaffigalutaluunniit